Miðasala á leik Íslands og Sviss í Þjóðadeildinni á mánudaginn tók kipp þegar íslenska liðið gerði 2-2 jafntefli við frönsku heimsmeistarana í gær.

Samkvæmt Twitter-síðu KSÍ seldust rúmlega 1000 miðar á leikinn gegn Sviss í gær. 

Mark Birkis Bjarnasonar á 31. mínútu í leiknum í Guingamp kveikti heldur betur í landanum en eftir það seldust 700 miðar á leikinn gegn Sviss.

Miðasala á leikinn gegn Sviss fór hægt af stað en úrslitin og frammistaðan gegn Frakklandi hefur vakið áhuga þjóðarinnar að nýju.

Ísland er án stiga eftir fyrstu tvo leikina í Þjóðadeildinni og svo gott sem fallið úr A-deild hennar. Seinni tveir leikirnir í keppninni skipta samt máli upp á styrkleikaröðun í undankeppni EM 2020.

Kaupa má miða á leikinn á tix.is, eða með því að smella hér.