Handbolti

Refsað fyrir öll þau mistök sem gerð voru

Íslenska karlalandsliðið í handbolta mætti ofjörlum sínum þegar liðið tók á móti ríkjandi Evrópumeisturum Spánar í öðrum leik sínum á heimsmeistaramótinu í handbolta karla í München í gær. Niðurstaðan var sjö marka tap.

Gísli Þorgeir Kristjánsson sem lék vel í sínum fyrsta leik á stórmóti sækir hér að spænska markinu. FRÉTTABLAÐIÐ/GETTY

Ísland hefur beðið ósigur í fyrstu tveimur leikjum sínum á heimsmeistaramótinu í handbolta karla, en í gær voru það Spánverjar höfðu betur 32-25 í leik liðanna í annarri umferð B-riðilsins. Íslenska liðið hóf leikinn af miklum krafti og hélt í við Spánverja fram í miðbik fyrri hálfleiks, en þá skildi leiðir og Spánn fór með fimm marka forskot inn í hálfleikinn.

Aftur náðu leikmenn íslenska liðsins góðum kafla í upphafi síðari hálfleiks, en góð markvarsla Björgvins Páls Gústavssonar leiddi til marka úr hraðaupphlaupum og staðan eftir tæplega tíu mínútna leik í seinni hálfleik 19-16 Spáni í vil. Þá hrökk spænska liðið hins vegar aftur í gang og nýtti sér all þau mistök sem íslenska liðið gerði bæði í varnarleik og sóknarleik. Niðurstaðan sjö marka sigur sem var þó full stór miðað við þróun leiksins.

Halldór Jóhann Sigfússon, þjálfari karlaliðs FH, var álitsgjafi Fréttablaðsins að þessu sinni, en hann var ánægður með spilamennsku íslenska liðsins að mörgu leyti. Honum fannst hins vegar munurinn of mikill í lokin og mistökin sem ungt og óreynt lið Íslands gerði voru dýrkeypt. Hann var ánægður með leik Ólafs Andrésar Guðmundssonar og innkomu Gísla Þorgeirs Kristjánssonar.

„Við byrjuðum leikinn mjög vel, en svo fórum við að fá ódýrar brottvísanir og þeir nýttu yfirtöluna afskaplega vel. Við vorum svo ekki að ná upp nógu góðri hjálparvörn í varnarleiknum og þeir nýttu klókindi sín til þess að galopna vörnina trekk í trekk. Björgvin Páll Gústavsson átti góða innkomu í íslenska markið sem veitti okkur líflínu, en tæknifeilar á þeim kafla þar sem við vorum að saxa forskotið urðu okkur að falli,“ sagði Halldór Jóhann í samtali við Fréttablaðið.

„Það má svo ekki gleyma því að við vorum að etja kappi við gríðarlega sterkt lið með ógnvænlega breidd í sínum leikmannahópi. Þeir gátu rúllað á leikmönnum eins og Daniel Sarmiento, Raúl Entrerríos, Ángel Fernández, Joan Canellas og Alex og Daniel Dujshebaev í útilínunni hjá sér. Þetta eru allt leikmenn í hæsta gæðaflokki sem kæmust í hvaða landslið sem er. Það munar miklu að geta skipt mínútum á milli svona góðra leikmanna,“ sagði Halldór Jóhann um andstæðinginn að þessu sinni.

„Það var jákvætt að sjá Ólaf Guðmundsson láta til sín taka og mér fannst gaman að sjá hvað Gísli Þorgeir var óhræddur og skilvirkur í sínum sóknaraðgerðum. Mér fannst markvarslan líka fín á köflum, en það vantaði herslumuninn í varnarleiknum og aðeins meiri aga í sóknarleiknum til þess að fá eitthvað út úr þessum. Mér fannst frammistaðan bæði í þessum leik og í leiknum gegn Króatíu hins vegar heilt yfir fín.

Við vorum að spila með útilínu sem hafði að geyma leikmenn um tvítugt í öllum stöðum og þeir stóðu sig bara feikilega vel. Teitur Örn Einarsson minnti á sig þær mínútur sem hann spilaði. Við erum í uppbyggingarfasa með þetta lið og þetta er allt á réttri leið. Menn læra af þeim mistökum sem þeir eru að gera og laga það sem upp á vantar til þess að komast nær jafn sterkum þjóðum þjóðum og Spánn er,“ sagði þjálfarinn um stöðu mála hjá íslenska liðinu.hjorvaro@frettabladid.is

Athugasemdir

Auglýsing
Auglýsing

Tengdar fréttir

Handbolti

Fyrsta tap Kristjáns kom gegn Noregi

Handbolti

Línur munu skýrast í milliriðlunum

Handbolti

Góður skóli fyrir ungt lið Íslands

Auglýsing

Nýjast

ÍR, KR og Njarðvík í Höllina

Boateng til Barcelona

NFL-stjarna kíkti á Gullfoss

„Ekki hægt að biðja um betri byrjun“

Elín Metta með tíu landsliðsmörk

Elín Metta á skotskónum á Spáni

Auglýsing