Hagnaður var á rekstri knattspyrnudeildar Breiðabliks á árinu 2022 og nam hann rúmum 157 milljónum króna. Hagnaðurinn kemur þó til vegna þess að félagið fékk rausnarlega gjöf frá stuðningsmanni félagsins sem féll frá á síðasta ári.
Gríðarleg aukning er í kostnaði hjá Breiðabliki á milli ára en af þeim félögum sem skilað hafa ársreikningi sínum á þessu ári er Breiðablik í sérflokki þegar kemur að tekjum og útgjöldum.
Rekstrartekjur Breiðabliks á síðasta ári voru 902 milljónir og aukast um tæpar 230 milljónir á milli ára. Þar vegur þyngst 203 milljóna króna gjöf Guðmundar Óskarssonar, tekjur af seldum leikmönnum voru 116 milljónir króna og aukast um 46 milljónir á milli ára.
Tekjur af mótum voru 259 milljónir árið 2022 og lækkar sá tekjuliður um tæpar 20 milljónir á milli ára. Rekstrargjöld Breiðabliks voru 746 milljónir á síðasta ári og eykst kostnaðurinn við deildina um 120 milljónir á milli ára.
Þar munar mestu um gríðarlegan kostnað við leikmenn, þjálfara og yfirstjórn. Breiðablik borgaði í laun og annan kostnað 531 milljón árið 2022 en sá kostnaðarliður hækkar um 110 milljónir á milli ára. Þessi mikla aukning í kostnaði skilaði sér innan vallar en meistaraflokkur karla varð Íslandsmeistari í fyrsta sinn í tólf ár á síðasta ári.
Eiga mikla fjármuni
Knattspyrnudeild Breiðabliks er vel stæð og veltufjármunir deildarinnar eru 308 milljónir króna, munar þar mestu um verðbréfaeign sem er 178 milljónir króna en var 0 krónur árið á undan. Hafði félagið hagnast um tvær milljónir á verðbréfaeign sinni á síðasta ári.
Er þessi verðbréfaeign færð undir þann styrk sem kom frá Guðmundi Óskarssyni en um gjöfina segir í ársreikningi Breiðabliks: „Var það sett í sjóð sem verður notaður til góðra verka en allar úthlutanir úr sjóðnum þarf að bera undir stjórn. Haldið er utan um sjóðinn á sérstökum eiginfjárreikningi.“
