Pavel Ermolinskij hefur ákveðið að leggja körfuboltaskóna á hilluna. Hann greinir frá ákvörðun sinni með hjartnæmri aðsendri grein í Skessuhorn. Pavel varð átta sinnum Íslandsmeistari í körfubolta og er á meðal merkustu körfuboltamanna Íslands.

„Fyrir stuttu vorum við fjölskyldan í stuttri heimsókn á æskuslóðum mínum. Við Emil, 18 mánaða gamall sonur minn, stukkum út í göngutúr og í leit að ævintýrum. Við byrjuðum á Bjössaróló og prufuðum öll tækin sem þar hafa staðið áratugum saman," skrifar Pavel í aðsendu greininni sem birtist í nýjasta tölublaði Skessuhorns.

„Hafandi gengið úr skugga um að þau væru enn jafngóð og skemmtileg og daginn sem þau voru byggð, klifruðum við niður stigann í átt að fótboltavellinum, hlupum um og spörkuðum í alla bolta sem aðrir krakkar höfðu skilið eftir."

Á þessum tímamótum verð ég enn meðvitaðri um að síðustu tveir áratugir í lífi mínu hefðu farið á allt annan veg ef að það væri ekki fyrir Borgarnes og móttökurnar sem ég fékk þar, þá 5 ára gamall.

Pavel segir að því næst hafi leiðin legið í íþróttahúsið til að sjá hvort eitthvað væri að gerast þar.

„Auðvitað var körfuboltaleikur í gangi. Sonur minn, sem að jafnaði hreyfir sig hratt, og óörugglega, setti persónulegt met er hann sat í heilar 10 mínútur og horfði þegjandi á. Við gengum svo í gegnum Skallagrímsgarð þar sem Emil kynntist strák á svipuðum aldri og fóru þeir yfir þessar helstu fréttir og leystu einhver mál."

Þegar heim var komið rann upp fyrir Pavel að sonur hans var að taka svipaðan hring og hann sjálfur tók ítrekað sem barn.

„Borgarnes var mitt eigið Disneyland. Fyrir 30 árum síðan opnaði Borgarnes fang sitt og tók á móti mér, foreldrum mínum og bróður mínum og breytti lífi okkar til hins betra. Ég var orðinn vinamargur og búinn að læra íslensku á innan við viku frá komu, allavega í minningunni.

Ég og félagar mínir eyddum stórum hluta af okkar tíma í allskonar íþróttir. Við bjuggum til fótboltavelli á nær öllum grasblettum bæjarins og spiluðum úrslitaleik HM á þeim. Sérstaklega vorum við þó í körfubolta, enda Borgarnes annálaður körfuboltabær og allir með körfu hangandi upp á hurð í herberginu eða bílskúrnum."

Alla tíð hafi körfubolti staðið honum nálægt og verið hans allra besti vinur en körfubolti var upphaflega ástæða þess að Pavel flutti búferlum til Íslands frá Rússlandi á sínum tíma.

„Hann varð seinna meir atvinna mín í 20 frábær ár. Nú er komið að því að ég hef ákveðið að segja skilið við þessa íþrótt sem leikmaður. Ég hef átt nokkur rifrildi við körfuboltann í gegnum tíðina en hann brosti alltaf þegar ég kom skömmustulegur að biðja hann afsökunar. Hann tók þá bara utan um mig og bauð mér upp á endalaus tækifæri til þess að búa til frábærar minningar.

Á þessum tímamótum verð ég enn meðvitaðri um að síðustu tveir áratugir í lífi mínu hefðu farið á allt annan veg ef að það væri ekki fyrir Borgarnes og móttökurnar sem ég fékk þar, þá 5 ára gamall."

Pavel varð sjö sinnum Íslandsmeistari með KR, þar á meðal sex sinnum í röð á árunum 2013-2019. Þá vann hann einn Íslandsmeistaratitil með Val á síðasta tímabili. Pavel hefur þá um áraraðir verið fastamaður í landsliði Íslands í körfubolta.