Grískir fjölmiðlar fullyrða að PAOK sé búið að leggja fram tilboð í landsliðsmiðvörðinn Sverri Inga Ingason sem leikur með Rostov í Rússlandi.

Samkvæmt heimildum SDNA er PAOK tilbúið að greiða fjórar milljónir evra fyrir Sverri Inga sem samdi við Rostov sumarið 2017.

Sverrir hefur verið í lykilhlutverki hjá Rostov þar sem hann hefur leikið við hlið Ragnars Sigurðssonar í Rússlandi.

Þar áður hefur Sverrir leikið með Granada á Spáni, Lokeren í Belgíu og Viking í Noregi á atvinnumannaferlinum.

PAOK sem lenti í öðru sæti grísku deildarinnar í fyrra hefur tvívegis orðið grískur meistari, síðast árið 1985.

Þá á hann að baki 26 leiki fyrir hönd Íslands.