Knattspyrnusamband Íslands birti drög að reglum sem eiga að bjarga Íslandsmótinu. Drögin eru 12 blaðsíður og þar eru ítarlegar leiðbeiningar um hvernig leikmenn þurfa að haga sér milli æfinga og leikja. „Ósanngjörn krafa,“ segir forseti leikmannasamtakanna.

„Persónulega finnst mér þetta ósanngjörn krafa á leikmenn nema það verði komið til móts við þá á einhvern hátt,“ segir Arnar Sveinn Geirsson, forseti leikmannasamtaka Íslands, um drög KSÍ um hvernig sé hægt að blása lífi í Íslandsmótið á ný.

KSÍ birti drög að reglum sem telja 12 blaðsíður og eiga að bjarga mótinu. Þar er að finna nokkuð ítarlegur kafli um leikmenn og hvernig þeir þurfa að haga sér milli æfinga og leikja og í leikjum.

Leikmenn, þjálfarar, dómarar og aðrir starfsmenn liða þurfa að lágmarka samskipti við aðra og forðast fjölmenna staði eins og verslanir, veitingastaði, bíó og skemmtistaði. Ef það er þó nauðsyn skal alltaf halda tveggja metra fjarlægð og vera með andlitsgrímu.

Það verður áhugavert að heyra hvað leikmenn eiga að gera milli æfinga og leikja.

Á heimasíðu KSÍ segir að reglurnar séu meðal annars byggðar á almennum sóttvarnakröfum heilbrigðisyfirvalda á Íslandi, en styðjist einnig við sambærileg gögn meðal annars frá Þýskalandi, Danmörku og UEFA.

Arnar Sveinn segir að íslenska deildin sé, þó sumir formenn keppist við að kalla fótboltann á Íslandi atvinnugrein og leikmenn atvinnumenn, ekkert annað en hálfatvinnumennska og það sé erfitt að biðja áhugamenn að haga sér eins og atvinnumenn. „Sumir hafa ágætlega upp úr því að spila fótbolta á Íslandi en það er mikill minnihluti, og örugglega fleiri sem fá lítið sem ekkert en þeir sem hafa það fínt. Að ætlast til þess að skikka leikmenn, sem flestir eru að gera þetta í bland við vinnu eða skóla, til þess að haga sér eins og atvinnumenn í þessu umhverfi – mér finnst það ósanngjörn krafa og ég sé það ekki gerast.“

Hann segir að samráðið við KSÍ hafi verið gott og sambandið hafi unnið vel með hagsmunaaðilum en þegar drögin voru samin var ekkert samráð haft og las Arnar Sveinn drögin eins og flestir aðrir á heimasíðu KSÍ. „Hvað þetta varðar höfðum við ekkert heyrt og lásum um þetta um leið og fréttin birtist. Og það er verið að biðja um helling frá leikmönnum.

Er það eðlilegt að þessi krafa sé sett á leikmenn og hvað þýðir þetta? Er þetta eitt af skilyrðunum til að fótboltinn fari af stað og ef svo er, hvernig er hægt að setja svona skilyrði á leikmenn án þess að rætt sé við þá? Fyrir mér er þetta enn þá frekar óljóst. Ég sé ekki hvort þetta eru skilyrði eða tilmæli.

Ef það kemst upp að leikmenn séu að fara út á mannamót einhvern þriðjudaginn er þá mótinu stofnað í hættu? Það eru margar spurningar í þessu.“

Leikmenn mega ekki heilsast fyrir leiki heldur aðeins klappa. Þá er regluverkið í kringum leikdag orðið mjög ítarlegt. Fréttablaðið/Ernir

Séu drögin skoðuð og skyldur leikmanna skoðaðar eru þær orðnar töluverðar. Á æfingum þarf að bera grímu en samt ekki meðan á æfingunni stendur. Sótthreinsa þarf allan búnað í líkamsræktaraðstöðu félaganna og alltaf halda tveggja metra reglunni þar inni. Leikmenn mega ekki deila vatnsbrúsa og á liðsfundum skal notast við andlitsgrímur. Þá má ekki fara í viðtöl við fjölmiðla aðra en sjónvarpsrétthafa nema með fjartækni.

Eftir leiki er ekki lengur matur í boði heimaliðsins heldur þurfa leikmenn sem og aðrir að koma með mat í lokuðum ílátum.

Á leikdag þarf helst að koma á sínum einkabílum. Skylda er að vera með grímu í búningsklefa á leikdag og ekki vera inni í klefanum lengur en 30-40 mínútur fyrir og eftir leiki.

Engar liðsmyndir eru lengur leyfðar, liðin ganga sitt í hvoru lagi og er bannað að heilsa og óheimilt er að fagna mörkum nema með brosinu einu saman. Alls ekki með snertingu. Þá er bannað að hrækja og markmenn fá ekki að hrækja í hanskana sína.

Leikmenn þakka ekki fyrir leikinn og takast ekki í hendur eftir leiki. Arnari finnst þó margt orka tvímælis. „Auðvitað skilur maður sambandið í því að það þurfti að gera einhverjar ráðstafanir til að fá þessa undanþágu.

Maður spyr sig samt á móti – er þetta gott fyrir íþróttina og það verður að koma í ljós. Það er margt í þessum drögum sem er hægt að skoða. Það má ekki fagna með snertingu en það eru einhverjar hornspyrnur í hverjum leik og einhverjar aukaspyrnur. Má þá ekki lengur dekka nema vera tvo metra frá? Má ekki stilla upp varnarvegg nema með tveggja metra reglunni? Það er margt í þessum drögum sem heldur engu vatni fyrir mér en á sama tíma skil ég að það þurfi að setja einhverjar reglur.“

Sviðsmynd fótboltans á Íslandi verður eins og annars staðar – án áhorfenda. Fréttablaðið/Valli

Ljóst er að mótið mun lengjast eitthvað en reynt verður að ljúka mótinu fyrir 1. desember. Arnar segir að samkvæmt sínum upplýsingum muni samningar leikmanna framlengjast sjálfkrafa um þann tíma sem mótið tekur. „Félagið þarf að standa við sínar skuldbindingar og leikmenn líka. Þetta eru þær fréttir sem ég fékk frá KSÍ um mitt sumarið. Hvort það hafi eitthvað breyst veit ég ekki. Nú er þetta ekki aðeins út október heldur mögulega út nóvember. Geta félögin staðið við sitt? Geta félögin staðið við sitt þegar engar tekjur eru að koma inn? Þetta er eitthvað sem á eftir að útfæra og þarf að gerast fyrr en síðar.

Það gengur ekki að 15. október þegar flestir samningar renna út að þá væri ennþá einn og hálfur mánuður eftir af mótinu. Félögin sjá kannski fram á að geta ekki greitt leikmönnum eða staðið alfarið við sitt og leikmenn vilja þá ekki spila undir þeim aðstæðum. Hvað gerist þá?“

Arnar segir að hann finni auðvitað til með KSÍ að finna lausnirnar í þessu erfiða árferði. Það sé þó þeirra starf. „Samúð mín er alveg hjá vinum mínum í Laugardalnum í KSÍ en á sama tíma er þetta þeirra vinna að finna út úr þessu og hvort sem er um heimsfaraldur að ræða eða ekki þurfum við að finna lausn á mótahaldinu. Það verður áhugavert ef undanþágan fæst því þá verður þetta skýrara og væntanlega kynnt betur.

Þá verður áhugavert að heyra hvað leikmenn eiga að gera milli æfinga og leikja. Það er helvíti djarft að ætlast til að leikmenn hitti enga milli æfinga og leikja. Þetta verður áhugavert eins og tímarnir sem við lifum á.“