Mick Schumacher, varaökumaður Mercedes og McLaren í Formúlu 1 er orðaður við ökumannssæti hjá liði Audi og Sauber Group sem mætir til leiks í Formúlu 1 árið 2026.
Í ágúst á síðasta ári var greint frá því að þýski bílaframleiðandinn Audi ætli sér að vera með í Formúlu 1 frá árinu 2026. Liðið mun taka höndum saman með Sauber Group og senda inn lið það tímabilið en á sama tíma tekur gildi ný reglugerð í mótaröðinni.
Nú þegar eru farnar af stað vangaveltur um það hvaða ökumenn gætu myndað ökumannsteymi liðsins og hefur nafn Mick Schumacher, sem er sonur Formúlu 1 goðsagnarinnar Michael Schumacher borið á góma.
Mick gegnir nú hlutverki varaökumanns Mercedes og McLaren en hann á að baki tvö keppnistímabil í Formúlu 1 sem liðsmaður Haas.
Audi mun fljótlega vilja ráða inn ökumenn í sitt lið, ökumenn sem geta verið liðinu innan handar í þróun bíls fyrir 2026 tímabilið. Framkvæmdastjóri Formúlu 1 verkefnis Audi segir, í samtali
við Der Spiegel, að engar viðræður hafa átt sér stað milli liðsins og Mick Schumacher, hins vegar heilli það alltaf að vera með þýska ökumenn á mála hjá þýsku liði.
Formúla 1 mun frá tímabilinu 2026 taka í notkun nýjar vélar með áherslu á sjálfbærni og hagkvæmari framtíð, mótaröðin er í eigu Liberty Media sem hefur það markmið að gera Formúlu 1 kolefnishlutlausa árið 2030.
Helst ber kannski að nefna að bílarnir munu ekki brenna neinu nýju jarðefnaeldsneyti. Formúla 1 í samstarfi við Aramco hefur staðið fyrir veigamiklum og ítarlegum rannsóknum undanfarið og afrakstur þess er fullkomlega sjálfbært eldsneyti.
