Knattspyrnuþjálfarinn Óli Stefán Flóventsson sem þjálfar karlalið Sindra veltir þeirri spurningu upp hvort þjálfarar séu lagðir í einelti í pistli sem hann birtir á facebook-síðu sinni. Óli Stefán segist hafa velt þessu fyrir sér á þeim fimm árum sem hann hefur þjálfað í efstu deildum á Íslandi.

Seinna í pistlinum opnar Óli Stefán sig um einelti sem hann varð fyrir í æsku og segir hann þau gömlu sár rifna upp þegar hann verður fyrir ómaklegri gagnrýni fyrir störf sín í knattspyrnuþjálfun. Óli Stefán segir hins vegar að gagnrýni sé holl og menn megi vissulega hafa skoðanir.

„Umfjöllunin er orðin gríðarleg og mikil fagmennska í þeirri beinagrind sem sett er upp í kringum starfið okkar. Ég fagna sérstaklega að umfjöllun kvennaknattspyrnu sé að stór aukast enda löngu kominn tími á það að sérfræðingarnir okkar sýni stelpunum þann áhuga sem þær eiga skilið.

Á sama tíma hafa samfélgasmiðlar stóraukist og þessi neikvæða, niðurrifs rödd mjög ríkjandi. Í kringum íþróttir höfum við fært okkur á þann stall að allir sem horfa eru sérfræðingar um leikinn. Aristóteles segir : Öllum mönnum er þekkingarþrá í blóð borin.“

Ef skoðun er vel rannsökuð og rökstudd getum við verið að tala um gagnrýni. Ef skoðun er hent fram óunnin eða eftir tilfinningu er það ekki gagnrýni heldur skoðun," segir Óli Stefán í upphafi pistilsins.

„Ég hef semsagt verið að þjálfa í efstu deildum í fimm ár, eitt ár í B deild og fjögur ár í A deild. Ég hef eytt mörgum árum í menntun í þjálffræði og er með UEFA Pró license frá norska knattspyrnusambandinu.

Þar lærði ég t.d um það að vera rekinn því það er svo algengt er að við séum reknir úr störfum okkar, oft vegna óraunhæfa væntinga sem búnar eru til af fólki sem hefur „skoðanir“

Ég hef farið á námskeið í öllum andskotanum, sem ég hef haldið að komi að notum í starfinu og farið í heimsóknir út um allan heim til stórliða og stórþjálfara, til að læra meira um knattspyrnustjórnun.

Starf mitt er í raun hópa-stjórnun, þ.e ég vinn með 30 manna hóp af mjög ólíkum einstaklingum á öllum aldri, allir með ólíka eiginleika og ólíkt bakland. Ég þarf að hámarka afköst hópsins og hópurinn verður að róa í takt og ALLIR í sömu átt.

Til þess að það gerist þarf ég að vinna mjög náið með leikmönnum og hjálpa jafnvel með vandamál sem koma heiman-frá........ótrúlega mikið af mínum tíma fór í það, einmitt til þess að auka líkurnar á sigri í næsta leik. Ég vinn undir stjórn og framkvæmdastjóra sem hafa hinar og þessar menntanir, margir þeirra eru stjórnendur í fyrirtækjum, jafnvel lögreglumenn/konur eða læknar," segir hann svo um bakgrunn sinn og um eðli starfs síns.

Óli Stefán beinir svo sjónum sínum að fjölmiðlum á Íslandi og þeirri gagnrýni sem þar er sett fram á störf þjálfara.

„Engin eða mjög fáir af þessu fólki hefur mína sérfræðiþekkingu eða reynslu í þjálfun. Það er fjallað um starf okkar þjálfara mjög opinskátt, enda eru allir sérfræðingar í starfinu okkar. Ólafur Kristjánsson fyrrverandi þjálfri FH sagði í samtali við fjölmiðil þegar hann var spurður út í harða „gagnrýni“ á sig (Ég ætla að segja harða skoðun á honum)

Óli, sem er einn af þeim allra bestu sem við eigum, svaraði svona: „Þú elskar íþróttina, ert áhugamaður um hana og hefur skoðun á henni. Ég er sérfræðingur um hana, hef menntun og reynslu í knattspyrnuþjálfun.„

Mér hefur líka verið hrósað fyrir vel unnið starf oft og iðulega af fjölmiðlum. Ég hef réttilega verið gagnrýndur þar sem ég hef líklega gert fleiri mistök en margir af bestu þjálfurum Íslands. Svo er það skoðunin á mér!

Áður en ég byrja þar þá vil ég taka það fram að ég virði skoðanir, og ekki nokkur maður þarf að hafa jákvæða skoðun á mér, nema síður sé. Það er algjörlega ekki mín ætlun að segja náunganum að hann verði að hafa jákvæða skoðun á mér eða tala bara um mín störf á jákvæðan hátt," segir Óli Stefán um sína fjölmiðlaumfjöllun í sinn garð..

„Þegar að neikvæð skoðun á þjálfurum er síendurtekin, þjálfarinn niðurlægður, og jafnvel strítt til þess að auka við hlustun, lestur eða áhorf, líkist það mjög skilgreiningu á ákveðinni hegðun........ Hvað kallast þessi hegðun aftur ?

„Skilgreining á einelti er að það þegar einstaklingur er oft tekinn fyrir, þegar hann eða hún er óvarin(n) fyrir neikvæðum atgangi eins eða fleiri einstaklinga“ (Olweus 1993)

„Einnig má tala um andlegt einelti sem munnlegt einelti líka, en þá eru orð notuð í neikvæðum tilgangi til þess að valda þjáningum annarra. Dæmi um munnlegt einelti er slúður, niðurlæging og stríðni“ (Suckling 2001)

Það þarf ekki annað en að hlusta á vinsælastu podcöst landsins í 5 mín til að heyra þessa hegðun. Ég þarf ekkert að leita vel og innilega til að finna fyrir þessu í garð allra þjálfara á Íslandi og út um allan heim," segir hann um upplifun sína af umfjöllun um störf hans.

„Í síðasta viðtali sem ég fór í eftir leik við Fjölni sem endaði 1-1 í sumar var borin upp "spurning" á þá leið að það væri altalað að liðið mitt kýli bara boltanum eitthvað, ekkert plan eða neitt.

Heldur fólk í alvöru að mitt upplegg í leik sé þannig þegar að öll vikan hefur farið í undirbúning leiksins ?

Í leik móti KR þegar ég var með Grindavík 2018 vorum við í lok leiks að reyna að spila í gegnum hápressu KRinga. Við töpuðum boltanum illa og fengum á okkur mark. Eftir leik sagði einn sérfræðingurinn í Pepsí mörkunum :

„Ég bara skil ekki hvað þeir eru að reyna að spila boltanum frá markmanni, þetta fer þeim bara alls ekki“

Þetta fer þeim bara alls ekki ! Ein setning í stúdíói, ein skoðun „sérfræðings“ og alheimur hlustar og mótar sína skoðun út frá þessari vel rannsakaðri skoðun.

Á tveimur árum eyddum við að meðaltali einni æfingu á viku allt árið í þessa uppstillingu, þannig að gróflega höfum við verið búnir að æfa þessar hreyfingar á svona 100 æfingum En...hey !! þetta fór okkur ekki !

Við skoruðum fimm mörk þetta sumar úr þessari uppstillingu, við fengum níu önnur dauðafæri til að skora en á móti voru skorðuð tvö mörk á okkur.....en þetta fór okkur bara ekki!!," segir þjálfarinn enn fremur um þá gagnrýni sem sett hefur verið fram á starfsaðferðum hans.

Í lok pistilsins ræðir Óli Stefán svo eigin reynslu af einelti í æsku og þá vinnu sem hann hefur farið í til þess að vinna úr því áfalli sem eineltið var.

„Áður hef ég talað um að hafa verið hjá sálfræðingi til að vinna úr áfalli sem ég varð fyrir. Í þessari vinnu fór ég að kafa í ástæður þess að ég hef neikvæða, brenglaða sjálfsmynd og bý yfir miklu óöryggi. Af hverju eru þessi þyngsli og kvíði? Af hverju misnotaði ég áfengi? Geta virkilega legið tengsl þarna á milli? Áfengi í sömu setningu og brengluð sjálfsmynd og óöryggi?," segir Óli Stefán um afleiðingar eineltisins sem hann varð fyrir.

„Fyrir þá sem ekki vita átti ég ellefu ára edrú-afmæli núna 26. Október og ég hef verið þjálfari síðan ég varð edrú. Ég þekki eineltið aðeins of vel. Nokkrum sinnum hef ég komið inná það að ég var lagður í einelti í skóla þegar ég var yngri. Útlitið á mér var þannig að ég var með framstæðar tennur og leið mjög illa yfir því.

Ég reyndi að fela brosið en það bara gekk ekki!! Þið megið geta í eyðurnar hvernig skólaganga mín var. Ég get allavega sagt að eftir skólagönguna var ég sérfræðingur um hreifadýrið „Odobenus rosmarus“....öðru nafni rostungur!

Oft tala ég um að íþróttirnar hafi bjargað mér og þær gerðu það. Ég varð vinur vinsælu strákana og gerði allt til að falla inn þar. Sjálfsagt hef ég gerst sekur um einelti líka og guð minn góður hvað ég bið þá hina sömu afsökunar ef ég hef valdið vanlíðan. Af því að ég hef þessa reynslu þá þekki ég tilfinninguna og hegðunina mjög vel," segir hann um eineltið sem hann varð fyrir á æskuárum sínum.

„Ég hef slökkt á allri umræðu um fótboltann hér á Íslandi því ég er hræddur um að ég verði nefndur á nafn þar og þeir sem hafa vopnin, míkrófón, tölvu eða sjónvarps cameru geri árás. Um leið og ég sé eða heyri nafnið mitt slekk ég. Þetta eru æsku-sárin að rifna!

Mér líður mun betur og ræð betur við starfið mitt þegar ég hlusta ekki. Áhuginn ástríðan og gleðin eru að koma aftur. Ég tók að mér þriðjudeildar lið Sindra eftir að hafa verið rekinn frá KA í sumar.

Ég á svo sannarlega minn hlut í því að hafa verið rekinn enda gerði ég mörg mistök. Engu að síður er ekki hægt að koma í veg fyrir þá hugsun að sí-endurteknar neikvæðar, særandi og mótandi skoðanir á mér hafi haft eitthvað að segja með það," segir Óli Stefán um þau áhrif sem gagnrýni hefur á hans andlegu líðan.

„Átta mánuðum áður en ég var rekinn, hafði ég stýrt KA í fimmta sæti efstu deildar sem er besti árangurs liðsins í tæp 20 ár, en í vetur töluðu allir í kringum mig um að það hafi verið heppni.

Af tólf árum í þjálfun hef ég aðeins einu sinn gert verr árið eftir heldur en árin á undan, s.s nánast alltaf bætt liðin mín. Ein af aðalástæðum þess að ég tók að mér þjálfarastarf í þriðju deild á Íslandi er sú að þar er lítil umfjöllun og ég get unnið ómengað starfið sem ég elska af ástríðu og alúð," segir hann um framhaldið hjá sér í þjálfun.