Ólafur Ingi Skúlason, landsliðsmaður í knattspyrnu, mun að öllum líkindum leika hér heima í Pepsi-deildinni eftir að heimsmeistaramótinu sem hefst í Rússlandi eftir tæpan mánuð lýkur.

Þetta segir Ólafur Ingi í samtali við fotbolta.net þar sem hann segist ekki vera búinn að ákveða með hvaða liði hann myndi spila. Ólafur Ingi er uppalinn hjá Fylki, en hann fór frá liðinu árið 2001 þegar hann gekk til liðs við Arsenal. 

Ólafur Ingi hefur leikið erlendis síðan árið 2001, en hann lék sem lánsmaður hjá Fylki árið 2003. Ólafur Ingi kveðst munu taka ákvörðun um næsta áfangastað sinn á ferlinum á næstu vikum.   

 Ég reikna með að spila hérna heima. Fjölskyldan er heima og ég hef verið úti í tvö ári án þeirra. Það er allt opið og ég hef ekki klárað neitt. Ég mun taka ákvörðun á næstu vikum eða bara eftir HM," sagði Ólafur Ingi í samtali við fotbolta.net.