Ólafur Gústafsson, leikmaður KIF Kolding, hefur verið úrskurðaður í þriggja leikja bann af aganefnd danska handknattleikssambandsins.

Í leik gegn Nordsjælland á mánudaginn kýldi Ólafur Nicolas Lundbye Kristiansen í magann. Atvikið, sem má sjá hér fyrir neða, fór fram hjá dómurum leiksins sem refsuðu Ólafi ekki.

Hafnfirðingurinn slapp hins vegar ekki við refsingu frá aganefndinni. Ólafur missir af leikjum Kolding gegn Ribe-Esbjerg, Skjern og GOG.

Síðustu dagar hafa ekki verið góðir fyrir Kolding. Á mánudaginn tapaði liðið fyrir Nordsjælland, á þriðjudaginn var þjálfarinn (Lars Frederiksen) rekinn og í dag var Ólafur úrskurðaður í þriggja leikja bann.

Kolding er í 10. sæti dönsku úrvalsdeildarinnar með tólf stig, sex stigum frá sæti í úrslitakeppninni.