Knattspyrnudeild KA hefur komist að samkomulagi við Óla Stefán Flóventsson um að hann hætti störfum sem þjálfari karlaliðs félagsins. KA hefur ekki farið vel af stað í deildinni í sumar en liðið situr í 11. sæti deildarinnar með þrjú stig eftir fimm leiki. KA hefur skorað fimm mörkum í þessum fimm leikjum og fengið á sig tíu á móti.

Óli Stefán tók við KA-liðinu fyrir síðasta keppnistímabili en liðið hafnaði í fimmta sæti Íslandsmótsins síðasta haust. Síðasti leikur Óla Stefáns við stjórnvölinn hjá KA var jafntefli liðsins gegn Fjölni um síðustu helgi en næsti leikur liðsins verður gegn Gróttu á laugardaginn kemur. Ekki liggur fyrir hver mun stýra KA-mönnum í þeim leik.

Yfirlýsingu KA má lesa í heild sinni hér að neðan

Knattspyrnudeild KA og Óli Stefán Flóventsson hafa komist að samkomulagi um starfslok Óla hjá félaginu.

Gengi KA það sem af er tímabili er ekki ásættanlegt og telja báðir aðilar nauðsynlegt að gera þessar breytingar til að liðið nái sér á strik og sýni sinn rétta styrk. Liðið náði fimmta sæti undir stjórn Óla Stefáns í fyrra sem er besti árangur félagsins síðan félagið kom aftur upp í deild hinna bestu á Íslandi.

Stjórn Knattspyrnudeildar KA þakkar Óla Stefáni fyrir framlag sitt til félagsins og óskar honum velfarnaðar í framtíðinni. Félagið mun nú þegar skoða sín mál varðandi þjálfun liðsins og mun ekki tjá sig nánar um málið að svo stöddu.