Arsenal festi í gær kaup á miðjumanninum Jorginho sem var á mála Chelsea. Jorginho er reynslumikill leikmaður sem reyndi snemma fyrir sér hjá félagsliðinu Hellas Verona í öðru landi en hann var alinn upp í. Í Verona hitti hann fyrir Emil Hallfreðsson, atvinnumann í knattspyrnu og fyrrum landsliðsmann sem tók hann undir sinn verndarvæng.
Það er við hæfi að rifja upp sögu Emils af kynnum sínum við Jorginho hjá Hellas Verona en Emil sagði þá sögu í hlaðvarpsþætti Snorra Björnssonar árið 2018.
Þrátt fyrir að Jorginho hafi á sínum ferli spilað fyrir ítalska landsliðið er hann alinn upp í Brasilíu en fór þaðan 15 ára gamall og hélt til Verona á Ítalíu. Þar skrifaði hann undir samning við Hellas Verona en Emil var leikmaður félagsins á þeim tíma.
„Ég tók hann að mér í byrjun,“ segir Emil um kynni sín af Jorginho. „Hann kemur til Verona 15 ára gamall og er bara með einhverjar 20 evrur á viku í laun hjá félaginu og býr inn á einhverri fjölskyldu. Þetta var ekkert djók, 15 ára gamall kemur hann til félagsins og mér fannst erfitt að fara í atvinnumennsku 20 ára gamall.“
Tuttugu evrur jafngilda um 3 þúsund íslenskum krónum á núvirði og því ljóst að hinn ungi Jorginho hafði ekki úr miklu að moða á sínum tíma.
„Jorginho fer 15 ára gamall frá Brasilíu til Ítalíu. Ég kynnist honum þegar að hann var 18 ára. Þá hafði hann farið á láni til félags í neðri deildunum og ég man hvað mér fannst hann góður. Þetta var góður gaur og ég sá hvað hann hafði mikinn metnað.
Ég byrjaði smátt og smátt að hjálpa honum, taka hann að mér og man þegar að ég bauð honum í fyrsta skipti að koma heim. Það var vegna þess að hann átti ekki pening fyrir Interneti. Ég gaf honum netpunginn minn svo hann gæti hið minnsta farið á Internetið og talað við fjölskylduna sína í Brasilíu og svona. Pældu í því.“
Emil segir að Jorginho hafi ekki alltaf fengið sénsinn hjá Hellas Verona.
„En ég átti í góðu sambandi við þjálfarann okkar hjá félaginu, hann bjó meðal annars fyrir ofan mig. Hann kallaði stundum á mig upp og vildi fá álit mitt á því hvernig hann ætti að stilla upp liðinu. Ég man að ég sagði við hann í eitt skipti að hann yrði að láta þennan Jorginho spila. Ég man bara að ég sagði við hann ´hann verður að spila, hann er hrikalega góður´ og á endanum gaf hann honum sénsinn.“
Emil segir að baulað hefði verið a Jorginho í fyrstu tveimur leikjum hans.
„Í kjölfar þess vitum við hvað gerðist, the rest is history.“
Glæsilegur knattspyrnuferill
Úr varð að að Jorginho átti eftir að vekja töluverða athygli fyrir spilamennsku sína hjá Hellas Verona. Það varð til þess að ítalska stórliðið Napoli kaupir hann í janúar árið 2014.
Hjá Napoli varð Jorginho að framúrskarandi leikmanni og varð meðal annars ítalskur bikarmeistari með liðinu tímabilið 2013/2014. Hann spilaði 160 leiki fyrir félagið, skoraði 6 mörk og gaf 14 stoðsendingar.
Framganga hans hjá Napoli átti eftir að veita Jorginho annað skref upp á við á hans knattspyrnuferli því árið 2018 kom kallið frá enska úrvalsdeildarfélaginu Chelsea.
Hjá Chelsea vann Jorginho Evrópudeildina árið 2019, Meistaradeild Evrópu 2021 og Heimsmeistarakeppni félagsliða í fyrra. Jorginho spilaði 213 leiki fyrir Chelsea, skoraði 29 mörk og gaf 9 stoðsendingar.
Þá á Jorginho að baki 46 A-landsleiki fyrir Ítalíu en hápunktur hans á landsliðsferlinum til þessa kom árið 2021 þegar Ítalía varð Evrópumeistari. Jorginho var valinn besti miðjumaður mótsins.
