Keníski hlauparinn Eliud Kipchoge setti í dag nýtt heimsmet karla í maraþonhlaupi. Gerði hann það þegar hann kom fyrstur í Berlínarmaraþoninu sem haldið var í Þýskalandi í dag. Hljóp hann maraþonið á 2 klukkustundum, einni mínútu og 39 sekúndum, eða 2:01:39. 

Fyrra heimsmet var slegið af Dennis Kimetto frá Kenía fyrir fjórum árum, einnig í Berlínarmaraþoninu. Var það 2:02:57 klst og því stórbætti Kipchoge heimsmetið í dag, eða um eina mínútu og 18 sekúndur.

Er um að ræða mestu bætingu heimsmets í maraþoni frá árinu 1968.

„Eina sem ég hef að segja er takk fyrir!“ Er haft eftir hlauparanum á vef AFP-fréttastofunar.

Kipchoge er einkar farsæll hlaupari og hefur sigrað tíu af þeim ellefu maraþonum sem hann hefur hlaupið, þar á meðal gullverðlaun á Ólympíuleikunum í Ríó.