Haukur Helgi Briem Pálsson, landsliðsmaður í körfubolta, mun leika með Njarðvík næstu þrjú árin.

Haukur Helgi hefur áður leikið með Njarðvíken hann var síðast á mála hjá ACB-liðinu Andorra á Spáni.

Hann er fyrsti leiknaðurinn sem Benedikt Rúnar Guðmundsson, nýráðinn þjálfari Njarðvíkur, fær til liðs við sig en þeir hafa áður unnið saman.

„Það var ekki auðveld ákvörðun að kveðja atvinnumennskuna á meginlandi Evrópu, það er stórt skref og stór ákvörðun og því hafa fylgt miklar tilfinningar. Við fjölskyldan erum þó að sækjast eftir meiri festu í okkar líf enda mikið hark og rót á atvinnumannaferli körfuknattleiksmanns,” sagði Haukur Helgi í samtali við heimasíðu UMFN.

Sjávarútvegurinn togaði hann heim

„Ég kem einnig heim til þess að leggja frekari grunn að framtíðarvinnu minni við sjávarútveginn og af þeim sökum finnst mér það réttasta skrefið fyrir okkur fjölskylduna að flytjast nú heim til Íslands.

Þessi ákvörðun hefur vissulega farið fram og til baka en þegar öllu er á botninn hvolft var þetta aldrei spurning,” sagði Haukur sem ber miklar tilfinningar til Njarðvíkurliðsins.

„Nú er búið að stokka spilin talsvert hjá félaginu og síðast þegar ég lék í Njarðvík var mér mjög vel tekið. Njarðvík, að mínu mati, á ekki að finna sig á þeim stað sem liðið var statt í vetur. Mitt verkefni með liðinu er að taka þátt í að snúa því við, byggja upp karakter og Njarðvíkurandann á nýjan leik.

Þess vegna tel ég sterkt að gera þriggja ára samning við félagið enda erfitt að búa eitthvað til aðeins á einu ári. Ég ætla mér að koma með metnað inn í félagið til að fara langt og gera atlögu að öllum titlum.”

Haukur hefur áður verið undir stjórn Benedikts Guðmundssonar en þá unnu þeir saman í yngri flokkum Fjölnis í Grafarvogi: „Ef það er eitthvað sem Benni hefur verið að gera vel þá er það að taka við liðum sem eru að finna sinn farveg, í fyrsta sinn eða upp á nýtt.

Hann má eiga það að slík verkefni leysir hann mjög vel. Ég þekki Benna mjög vel enda þjálfaði hann mig í yngri flokkum hjá Fjölni svo ég held að þetta verði fáránlega skemmtilegt.”