Forráðamenn knattspyrnudeilda níu félaga hafa tekið í sama streng og kollegar sínir hjá Íslenskum Toppfótbolta, ITF, með því að að fara fram á knattspyrnusamband Íslands, KSÍ, boði tafarlaust til aukaþings.

Það eru Einherji, ÍR, Magni, Leiknir F., Hamar, Völsungur, Víðir, Njarðvík og KV sem standa að baki framangreindri kröfu en ÍTF eru hagsmunasamtök félaganna í tveimur efstu deildum karla og kvenna og fyrrgreind félög eru í deildunum þar fyrir neðan.

Fram kemur í yfirlýsingunni sem sjá má hér að neðan að orðspor íslenskrar knattspyrnu sé stórlega skaðað og nauðsynlegt að endurnýja umboð stjórnar KSÍ og skapa traust til framtíðar.

Ósk um boðun til aukaþings Knattspyrnusambands Íslands
Í samræmi við 13. grein laga Knattspyrnusambands Íslands óska undirrituð fyrir hönd knattspyrnudeilda sinna eftir því að stjórn sambandsins boði tafarlaust til aukaþings.

Á síðustu dögum hafa farið fram umræður og verið teknar ákvarðanir innan stjórnar sem að augljóst er að þarfnast aðkomu aðildarfélaga sambandsins. Orðspor íslenskrar knattspyrnu er stórlega skaðað og því þarf tafarlaust að boða til þings og móta viðbrögð til framtíðar sem nýtur trausts allra aðildarfélaga og íslensks samfélags.

Neðangreind félög skora auk þess á sitjandi stjórnarmenn að skoða grein 13.5. í lögum KSÍ þar sem segir: 13.5. Á aukaþingi má ekki gera lagabreytingar og ekki kjósa stjórn, nema bráðabirgðastjórn, ef meirihluti kjörinnar aðalstjórnar hefur sagt af sér eða hætt störfum af öðrum orsökum, eða stjórnin að eigin dómi orðið óstarfhæf.

Á aukaþingi gefst sitjandi stjórnarmönnum færi á að endurnýja umboð sitt til starfa eða stíga frá þeim, með heildarhagsmuni íþróttarinnar að leiðarljósi.

Framundan er vinna sem horfa þarf til hagsmuna knattspyrnunnar á Íslandi. Krafa samfélagsins um gagnsæ viðbrögð og vinnuferli sem tekur á augljósum mistökum undanfarinna vikna, mánaða og ára getur einfaldlega ekki beðið. Til að traust ríki um þá vinnu er aðkoma allra aðildarfélaga KSÍ alger nauðsyn.

Virðingarfyllst,
Dagný Steindórsdóttir, gjaldkeri knattspyrnudeildar Einherja
Magnús Þór Jónsson, formaður knattspyrnudeildar ÍR
Gísli Gunnar Oddgeirsson, formaður knattspyrnudeildar Magna
Magnús Björn Ásgrímsson, formaður knattspyrnudeildar Leiknis F.
Ágúst Örlaugur Magnússon, formaður knattspyrnudeildar Hamars
Jónas Halldór Friðriksson, framkvæmdastjóri knattspyrnudeildar Völsungs
Einar Karl Vilhjálmsson, framkvæmdastjóri knattspyrnudeildar Víðis
Brynjar Freyr Garðarsson, formaður knattspyrnudeildar Njarðvíkur
Auðunn Örn Gylfason, formaður KV