Wolfsburg með landsliðsfyrirliðann Söru Björk Gunnarsdóttur innan borðs vann 0-1 sigur á Þór/KA á Akureyri í fyrri leik liðanna í 32-liða úrslitum Meistaradeildar Evrópu í dag. Wolfsburg endaði í 2. sæti Meistaradeildarinnar á síðasta tímabili og hefur unnið keppnina tvisvar.

Danska stórstjarnan Pernille Harder skoraði eina mark leiksins eftir hornspyrnu á 31. mínútu. 

Sara lék allan leikinn fyrir Wolfsburg sem var miklu meira með boltann og sótti stíft. Þýskalandsmeistararnir áttu tæplega 30 skot að marki Íslandsmeistaranna en boltinn fór aðeins einu sinni inn.

Mínútu fyrir leikslok var Sandra Stephany Mayor Gutierrez hársbreidd frá því að jafna þegar skot hennar fór í slána á marki Wolfsburg.

Seinni leikurinn fer fram á heimavelli Wolfsburg 26. september.