Íslenska karlalandsliðið í körfubolta hefur leik í undankeppni heimsmeistaramótsins, FIBA World Cup 2023, í næstu viku.

Þá á liðið tvo leiki dagana 26. nóvember og 29. nóvember.

Fyrst heldur liðið til Amsterdam og leikur gegn Hollandi 26. nóvember. Báðir leikirnir fara fram á útivelli að þessu sinni.

Eins og komið hefur fram að undanförnu þurfti að skipta um heimaleik og útileik gegn Rússlandi vegna aðstöðuleysis á Íslandi.

Ekkert hús stenst grunn keppniskröfur FIBA eins er en Laugardalshöllinn, sem er á undanþágu, er ónothæf eins og er.

Liðið heldur því frá Hollandi yfir til St. Pétursborgar þar sem liðið leikur gegn Rússlandi 29. nóvember.

Með liðunum þremur er einnig lið Ítalíu í sama riðli en næsti leikgluggi karla verður í febrúar 2022 og á Ísland þá tvo leiki gegn Ítalíu. Eins og staðan er í dag stefnir allt í að báðir þeir leikir þurfa að fara fram á Ítalíu.

Nú hefur Craig Pedersen þjálfari liðsins og aðstoðarþjálfarar hans valið 12 manna hópinn sem skipar landslið okkar í glugganum sem framundan er:

Landslið Íslands er þannig skipað fyrir komandi leiki.

Elvar Már Friðriksson · Antwerp Giants, Belgíu (56)

Hilmar Smári Henningsson · Stjarnan (7)

Jón Axel Guðmundsson · Bologna, Ítalía (13)

Kári Jónsson · Valur (22)

Kristinn Pálsson · Grindavík (23)

Kristófer Acox · Valur (44)

Martin Hermannsson · Valencia Basket, Spánn (69)

Ólafur Ólafsson · Grindavík (46)

Ragnar Ágúst Nathanaelsson · Stjarnan (55)

Tryggvi Snær Hlinason · Basket Zaragoza, Spánn (47)

Þórir Guðmundur Þorbjarnarson · KR (14)

Ægir Þór Steinarsson · Gipuzkoa Basket, Spánn (64)

Martin Hermannsson mun í þessum leikjum spila sína fyrstu landsleiki síðan í ágúst árið 2019 en hann hefur ekki fengið leyfi frá félagsliði sínu, Valencia, til þess að spila með íslenska liðinu síðustu tvö árin rúm.

Hörður Axel Vilhjálmsson, Keflavík, og Sigtryggur Arnar Björnsson, Tindastóli, eru meiddir og verða frá þátttöku í þessum glugga.

Þá er Haukur Helgi Briem Pálsson, Njarðvík, ennþá að ná sér að fullu af meiðslum sínum og er ekki orðinn leikfær.