Martin Hermannsson, landsliðsmaður í körfubolta, hefur samið við spænska úrvalsdeildarliðið Valencia. Þetta staðfesti Martin í samtali við Fréttablaðið í kvöld.

Martin kemur til Valencia frá þýska liðinu Alba Berlin en hann varð Þýskalandsmeistari með liðinu á nýafstaðinni leiktíð sem og bikarmeistari. Þá varð hann í öðru sæti með Alba Berlin í deild, bikar og Euro Cup tímabilið þar á undan.

Þessi uppaldi KR-ingur hefur einnig leikið með frönsku liðunum Étoile Charleville-Mézières og Champagne Châlons-Reims á ferli sínum. Hann varð tvisvar sinnum Íslandsmeistari með Vesturbæjarliðinu áður en hann hélt í LIU-háskólann í Brooklyn.

Hinn 25 ára gamli bakvörður er þriðji íslenski leikmaðurinn til þess að leika með Valencia en Jón Arnór Stefánsson gerði garðinn frægan hjá liðinu fyrst frá 2006 til 2007 og svo aftur frá 2015 til 2016.

Tryggvi Snær Hlinason lék svo með Valencia frá 2017 til 2019. Þá hefur Hilmar Smári Henningsson verið í herbúðum liðsina í rúmt ár.

Martin verður þriðji íslenski landsliðsmaðurinn sem spilar í spænsku efstu deildinni á næsta keppniatímabili en í gær var tilkynnt að Haukur Helgi Pálsson hefði samið við ACB Andorra og þá er Tryggvi Snær leikmaður Zaragoza.

Valencia hafnaði í sjöunda sæti deildarkeppninnar í vor og fór í undanúrslit í úrslitakeppni deildairnnar. Liðið var sömuleiðis slegið út í undanúrslitum í spænsku bikarkeppninni á leiktíðinni sem var að ljúka. Þá sat liðið í tíunda sæti í Euro League þegar keppni þar var hætt vegna kórónaveirufaraldursins. Valencia mun leika í Euro League á næsta tímabili.