Sundmennirnir Már Gunnarsson og Róbert Ísak Jónsson verða báðir í úrslitum kvöldsins á Evrópumeistaramóti IPC í sundi sem nú stendur yfir í Madeira í Portúgal.

Már synti sig inn í úrslit í 100 metra skriðsundi og Róbert í 200 metra fjórsundi. Róbert Ísak var fyrri til í undanrásum af íslensku keppendunum en hann synti á 2:16,78 mínútum og var þriðji inn í úrslitin.

Met Róberts í greininni er 2:14,16 mínútur og hefur staðið frá því á Evrópumótinu í Dublin árið 2018.

Már kom í bakkann á 1:05,38 mínútum og varð áttundi inn í úrslit kvöldsins. Met Más í greininni er 1:02,96 mínútur en metið setti hann í aprílmánuði á Íslandsmóti ÍF og SSÍ í Laugardal.