Sadio Mané þurfti að fara á sjúkrahús eftir leik Senagals og Grænhöfðaeyja í 16 liða úrslitum Afríkukeppninnar í fótbolta karla sem fram fer í Kamerún þessa dagana.

Mané skoraði fyrra mark Senegals í leiknum en hann lenti svo í samstuði við Vozinha, markvörð Grænhöfðaeyja, og fengu þeir báðir höfuðhögg við áreksturinn.

Vozinha var vísað af velli með rauðu spjaldi fyrir sinn þátt í þessu atviki en Mané hélt leik áfram í nokkra stund. Mané var svo skipt af velli og fór í kjölfarið á sjúkrahús til þess að fá aðhlynningu.

Mané er á góðum batavegi og gæti verið með þegar Senegal mætir annað hvort Gíneu eða Malí í átta liða úrslitum keppninnar á sunnudaginn kemur.