Keflavík kláraði leikinn á 16-2 spretti og náði að snúa leiknum sér í hag gegn KR í 85-79 sigri í lokaleik annarar umferðar Dominos-deildar karla í Sláturhúsinu í kvöld.

KR virtist vera með leikinn í höndum sér þegar gestirnir náðu átta stiga forskoti undir lok fjórða leikhluta en þá settu Keflvíkingar aftur í gír.

Reggie Dupree snarhitnaði fyrir utan þriggja stiga línuna og setti niður þrjá stóra þrista í röð á meðan skotin hjá KR voru ekki að detta niður.

Skoraði hann tíu af sextán stigum Keflvíkinga í röð undir lok leiksins er Keflvíkingar unnu fyrsta sigur tímabilsins.