Lamar Jackson, leikstjórnandi NFL-liðsins Baltimore Ravens gerði góðverk á dögunum er hann lét draum rætast hjá ungum stuðningsmanni sínum, Landon Berry sem glímir við hjartasjúkdóm. Faðir Landons varpar ljósi á góðverk Jackson í færslu sem hann birti á Facebook en Landon grét af gleði er leikmaðurinn birtist.
Jason Berry, faðir Landon Berry segir aðdraganda hittingsins teygja sig eitt ár aftur í tímann „þegar Landon sagði mér að uppáhalds lið sitt væri Baltimore Ravens.“
Ástæðan fyrir því var sú að Landon hafði hrifist af spilamennsku Lamar Jackson, leikstjórnanda liðsins. „Hann er algjört skrímsli inn á vellinum," sagði Landon við föður sinn.
Jason segir son sinn hafa talað um það í tíma og ótíma hversu mikið hann væri til í að hitta téðan Lamar Jackson. „Svo ég fór að hugsa hvernig ég gæti reynt að láta þann draum hans rætast.
Hann hafi horft á leikjadagskrá Baltimore Ravens fram í tímann og séð að þeir ættu leik gegn New Orleans Saints þann 7. nóvember. Feðgarnir búa í New Orleans og sjálfur er Jason stuðningsmaður Saints en hann leit ekki á það sem fyrirstöðu.
Jason byrjaði á því að senda tölvupóst, bæði til fulltrúa Ravens og Saints sem og öll þau sem honum datt í hug að gætu hjálpað. Á endanum fékk hans svar og það var jákvætt.
„Ég hélt að það myndi líða yfir mig vegna þess að draumur sonar míns var að fara rætast.“
Það var síðan fyrir tveimur dögum síðan sem draumur Landon Berry rættist og hann fékk að hitta hetjuna sína Lamar Jackson í eigin persónu. Tárin byrjuðu að streyma niður kinnar Landons, af gleði, og fékk hann meðal annars að kasta bolta á milli með hetjunni sinni.
