Hin stórefnilega skytta Lena Margrét hefur skipt yfir í Stjörnuna fyrir komandi leiktíð og hefur gert þeiggja ára samning við félagið.

Lena Margrét er fædd árið 2000 og er örvhent skytta. Hún hefur allan sinn feril leikið með Fram.

Lena Margréy hefur verið Íslandsmeistari með Fram í tvígang og hefur verið fastamaður í öllum yngri landsliðum Íslands.
Hún var meðal annars í U-20 ára liðinu sem varð í 10. sæti á HM árið 2018. Þá var hún einnig í U-18 ára liðinu og spilaði því með báðum liðum.

Á síðasta tímabili spilaði Lena bæði í Olísdeildinni og einnig með U-liði Fram í Grilldeildinni, hún gerði sér lítið fyrir og var markahæsti leikmaður deildarinnar.

„Það eru frábærar fréttir að Lena vilji ganga til liðs við okkur. Hún hefur verið ein efnilegasta handboltakona landsins lengi og ég er rosalega spennt að vinna með henni.

Ég hef fylgst með hennar handboltaferli síðan hún var aðeins 10 ára gömul en strax þá sá ég að metnaðurinn og hugarfarið hjá Lenu er til fyrirmyndar.

Hún er fjölhæfur leikmaður, með sterkt skot, gott auga og góð maður á mann. Hún kemur til með að styrkja okkar hóp gríðarlega mikið fyrir komandi átök í Olísdeildinni,” segir Rakel Dögg Bragadóttir, þjálfari Stjörnunnar um sinn nýjasta leikmann.