Leik Selfoss og Þórs/KA í Olís-deild kvenna sem átti að fara fram í kvöld hefur verið frestað til morguns vegna samgönguörðugleika. Leikurinn fer fram klukkan 20:00 annað kvöld.

Tveir leikir fara því fram í Olís-deild kvenna í kvöld. Haukar taka á móti Stjörnunni og HK sækir Fram heim.

Fimmtánda umferð Olís-deildarinnar hófst í gær með leik ÍBV og Vals. Gestirnir unnu stórsigur, 16-29, og náðu þar með fjögurra stiga forskoti á toppi deildarinnar.

Fram getur minnkað forskotið niður í tvö stig með sigri á HK. Það verða að teljast afar líkleg úrslit en HK-ingar hafa ekki unnið leik síðan 21. október.

Haukar geta styrkt stöðu sína í 3. sætinu með því að vinna Stjörnuna sem er í 6. sæti deildarinnar. Tveimur stigum munar á Stjörnunni og HK sem er í 7. sætinu. Selfoss er svo á botni deildarinnar með fjögur stig, þremur stigum á eftir HK.