Fimmtudaginn 16. janúar næstkomandi munu Njarðvík og Keflavík leiða saman hesta sína í Domino's-deild karla í körfubolta í Njarðtaksgryfjunni klukkan 20.15. Þennan daginn verða upp á dag 20 ár frá því að Örlygur Aron Sturluson, fyrrverandi leikmaður Njarðvíkur, lést langt fyrir aldur fram af slysförum.

Af þessu tilefni mun allur aðgangseyrir á leikinn renna óskiptur í Minningarsjóð Ölla en hann styrkir börn til íþróttaiðkunar sem ekki eiga kost á því vegna bágrar fjárhagsstöðu foreldra eða umsjónarmanna. Vallargestir eru hvattir til þess að mæta snemma til leiks því fyrir leik en frá klukkan 19.00 verður hægt að gæða sér á grilluðum hamborgurum.

Um glæsilega körfuboltaveislu er að ræða þennan dag því Stöð 2 Sport hefur sett upp frábæra dagskrá þennan fimmtudaginn sem hefst 18.10 með viðureign Njarðvíkur og Keflavíkur frá árinu 1999. Að leik loknum verður Domino´s Körfuboltakvöld með „Í minningu Ölla“ í beinni frá Njarðtaksgryfjunni og klukkkan 20.15 verður viðureign Njarðvíkur og Keflavíkur í beinni útsendingu. Að leik loknum mun Stöð 2 Sport sýna heimildarmyndina „Ölli“ eftir Garðar Örn Arnarson.

Minning Örlygs Arons Sturlusonar er öllum Njarðvíkingum og körfuknattleiksunnendum um land allt kær og hér er ærið tækifæri til þess að styðja vel við bakið á Minningarsjóði Ölla sem hefur um árabil stutt rækilega við bakið á ungum íþróttaiðkendum.

Þeir sem vilja leggja Minningarsjóðnum lið en komast ekki á leikinn geta lagt inn á reikning sjóðsins (Kt. 461113-1090, reikningsnúmer 0322-26-021585)

Hér getur þú kynnt þér Minningarsjóð Ölla