Knattspyrnudeild KA hefur skilað inn ársreikningi sínum en þar kemur í ljós að deildin var rekin með tæplega 10 milljóna króna tapi á síðasta ári. Tekjur deildarinnar lækka á milli ári en hagnaður upp á tæpar 50 milljónir króna var á rekstri KA árið 2021.
Launakostnaður hjá knattspyrnudeild KA hækkar mikið á milli ára og var 155 milljónir króna á síðasta ári, hækkar sá kostnaðarliður um 41 milljón á milli ára en liðið náði Evrópusæti í Bestu deild karla á síðasta ári.
Tekjur KA voru 292 milljónir í fyrra en voru rúmar 300 milljónir króna árið á undan, kostnaðurinn við reksturinn fór úr því að vera 265 milljónir og var 296 milljónir á síðasta ári. Tekjur vegna félagaskipta leikmanna voru 37 milljónir króna á síðasta ári en Nökkvi Þeyr Þórisson var seldur til Belgíu á miðju síðasta ári.
Reiknað er með að tekjur KA aukist mikið á milli ára með tilkomu peninga vegna þátttöku í Evrópukeppni karla, en félagið hefur nú þegar greitt leikmönnum út bónusa fyrir að vinna sér inn sæti í keppninni í sumar.
