Ousmane Dembele, sóknarmaður franska landsliðsins finnur ekki bara fyrir stressi innan vallar á Heimsmeistaramótinu í knattspyrnu sem fer fram í Katar þessa dagana. Liðsfélagi Dembele í franska landsliðinu, Randal Kolo Muani greindi frá öðrum aðstæðum sem Dembele er stressaður yfir.
Dembele óttast nefnilega villiketti sem er að finna víða á götum Doha í Katar þar sem franska landsliðið heldur til þessa dagana.
,,Ousmane er hræddur við ketti," greindi Muani frá á blaðamannafundi franska landsliðsins sem er komið í 16-liða úrslit HM.
Þó svo að um alvarlegt mál sé að ræða fyrir Dembele sjálfan segir Muani að liðsfélagar hans í franska landsliðinu hafi mjög gaman að þessum ótta hans.
,,Við hlægjum allir að þessu."
Franska landsliðið mætir því pólska í 16-liða úrslitum á sunnudaginn.
