Körfubolti

Kveður KR sem sjöfaldur meistari

Karlalið KR í körfubolta varð Íslandsmeistari fimmta árið í röð með sigri á Tindastóli í fjórða leik liðanna í DHL-höllinni á laugardaginn. Þetta var síðasti leikur Darra Hilmarssonar fyrir KR en hann flytur til Svíþjóðar í sumar. Darri kom aftur í KR árið 2013 og hefur átt stóran þátt í frábærum árangri liðsins síðan þá.

Félagarnir Brynjar Þór Björnsson og Darri Hilmarsson smella kossi á Íslandsmeistarabikarinn. Fréttablaðið/Anton

Það er ekki hægt að biðja um betri endi. Það er frábært að klára þetta fimm ára skeið á þessu. Ég átti ekki alveg von á þessu þegar ég kom aftur í KR 2013,“ sagði Darri Hilmarsson eftir að hann hafði lyft Íslandsmeistarabikarnum ásamt Brynjari Þór Björnssyni eftir sigur á Tindastóli, 89-73, á laugardagskvöldið.

Með sigrinum tryggðu KR-ingar sér fimmta Íslandsmeistaratitilinn í röð. Það er eitthvað sem engu liði hafði áður tekist eftir að úrslitakeppnin var tekin upp 1984. KR hefur alls 17 sinnum orðið Íslandsmeistari, oftast allra liða.

Sterkari liðsheild hjá KR

Tindastóll byrjaði báða hálfleikina betur á laugardaginn en KR var fljótt að stöðva áhlaup þeirra. Liðsheildin hjá KR var sterk og margir lögðu lóð sín á vogarskálarnar. 

Á meðan var sóknarleikur Tindastóls borinn uppi af bakvörðunum Pétri Rúnari Birgissyni og Sigtryggi Arnari Björnssyni. Þeir reyndu hvað þeir gátu en vantaði meiri hjálp.

Miklu munaði um að Antonio Hester­ fann sig ekki undir körfunni. Þar réði KR-ingurinn Kristófer Acox ríkjum en hann skoraði 23 stig og tók 15 fráköst. Í leikslok var Kristófer svo verðlaunaður fyrir að vera besti leikmaður úrslitaeinvígisins.

„Þetta var ekkert ósvipað og þriðji leikurinn. Við byrjuðum ekki vel en náðum að svara. Við náðum forskoti, þeir komu til baka en þá gáfum við aftur í. Við héldum þeim í skefjum,“ sagði Darri.

Darri sneri aftur í KR sumarið 2013 eftir þrjú tímabil á Suðurlandinu, eitt með Hamri og tvö með Þór í Þorlákshöfn. Þetta sama sumar gekk Pavel Ermolinskij aftur í raðir KR og Finnur Freyr Stefánsson tók við þjálfun liðsins.

KR-ingar eru í góðri æfingu við að lyfta bikurum. Fréttablaðið/Anton

Ellefu stórir titlar á fimm árum

Árangurinn síðan þá er einstakur. Á síðustu fimm árum hefur KR fimm sinnum orðið Íslandsmeistari, tvisvar sinnum bikarmeistari og fjórum sinnum deildarmeistari. Liðið hefur unnið 15 einvígi í úrslitakeppninni í röð og aðeins þrjú þeirra hafa farið í oddaleik.

„Finnur er búinn að standa sig frábærlega síðustu árin og hefur náð að hámarka getu okkar. Þetta hefur verið frábært,“ sagði Darri sem hefur alls sjö sinnum orðið Íslandsmeistari með KR. Fbl_Megin: Árin 2007 og 2009 var Darri í aukahlutverki en síðan hann sneri aftur í KR hefur hann verið einn af máttarstólpum liðsins, þótt það fari ekki alltaf mikið fyrir honum. Darri fær jafnan þá einkunn að vera vanmetinn, þ.e. leikmaður sem fær ekki alltaf það hrós sem hann á skilið.

Hann er sjaldnast meðal stigahæstu manna en skilar góðu starfi á báðum endum vallarins. Leikurinn á laugardaginn var klassískur Darra-leikur. Hann skilaði 11 stigum, fimm fráköstum, sjö stoðsendingum og spilaði góða vörn.

Nú er komið að leiðarlokum hjá Darra og KR en hann flyst búferlum til Svíþjóðar í sumar þar sem kona hans er á leið í sérnám í svæfingarlækningum. Það verður stórt skarð að fylla fyrir KR-inga.

Íslandsmeistarar KR 2018. Fréttablaðið/Anton

Titlarnir 2014 og 2018 sætastir

Darri segir erfitt að gera upp á milli Íslandsmeistaratitlanna en segir þann síðasta þó vera afar sætan, sérstaklega í ljósi þess sem gekk á hjá KR í vetur.

„Það er erfitt að velja á milli titilsins 2014 og þetta árið. Þeir eru báðir mjög sætir,“ sagði Darri. „Allur veturinn var brösóttur. Það voru meiðsli, spilamennskan upp og niður, skiptum um útlendinga og brotnuðum í leikjum sem er ólíkt okkur. En það er frábært að enda þetta svona.“

Grét í leikslok

Darri segir að sjálfsögðu erfitt að kveðja félaga sína í KR.

„Þetta er rosalega erfitt og maður grét þegar leikurinn kláraðist. Því miður getur maður ekki verið lengur með strákunum. En það verður að hafa það. Ég var búinn að ákveða að fara út með konunni 2018. En það tekur enginn þessa sjö titla af mér og strákunum. Þetta er frábært,“ sagði Darri áður en ungur KR-ingur gekk upp að svarthvítu hetjunni sinni og bað um verðlaunapeninginn hennar.

Athugasemdir

Auglýsing
Auglýsing

Tengdar fréttir

Körfubolti

Uppgjör fyrir fyrsta fjórðung í Dominos-deild kvenna

Körfubolti

Setti niður sex þrista í 4. leikhluta

Körfubolti

Skoraði síðustu tólf stigin í sigri

Auglýsing

Nýjast

Atli verður áfram í Kaplakrika

Leik ÍBV og Þórs/KA frestað vegna veðurs

Bjarki Már biður um þinn stuðning

Tvær FH-tíur tóku morgunæfingu í Kaplakrika

Nokkrir sóttu um starf yfirmanns knattspyrnumála

Fyrsti frá Bournemouth sem skorar fyrir England

Auglýsing