KSÍ sendi frá sér yfirlýsingu í dag vegna brots starfsmanna karlalandsliðsins á sóttvarnarlögum UEFA eftir leik Íslands og Rúmeníu.

Eins og Fréttablaðið fjallaði um í dag var starfsfólki sem var ekki á skýrslu óheimilt að fara inn á völlinn. Þorgrímur Þráinsson og Magnús Gylfason sem eru í teymi karlalandsliðsins, sáust inn á vellinum að faðma leikmenn eftir leik.

Á dögunum kom í ljós að Þorgrímur er með COVID-19 og fór því allt þjálfarateymið í sóttkví fyrir leikinn gegn Belgum.

Ekkert smit kom upp innan leikmannahópsins og var það metið svo að þeir þyrftu ekki að fara í sóttkví.

Í yfirlýsingu KSÍ segir að umræddir einstaklingar hafi verið hluti af starfsmannateymi liðsins og því á varamannabekknum sem tæknihluti liðsins. Þeim sé heimilt að fara inn á leikflötinn fyrir leik, í hálfleik og eftir leik. Þeir hafi haldið sig í sínu hólfi og hluti af ,,búbblunni“ sem landsliðið dvaldi í á Íslandi .

Þá bætir KSÍ við að skýringin á því að starfsfólkið sem um ræðir hafi ekki virt nálægðarmörk í tilteknu atviniki og sinnt sínum skyldum megi rekja til tilfinninga sem tengist íþróttinni þótt að það sé ekki afsökun.

Að lokum tekur KSÍ fram að sambandið mun leitast við að gera betur og standa undir þeirri ábyrgð sem KSÍ er ætlað í samfélaginu.

Yfirlýsingu KSÍ má lesa hér fyrir neðan.

Faðmlagið sem vakti athygli eftir leik Íslands og Rúmeníu
Fréttablaðið/Anton Brink

Vegna umfjöllunar um landsleiki og Covid-19

Vegna umfjöllunar um nýafstaðna leiki A landsliðs karla á Laugardalsvelli, sóttvarnir og Covid-19, og samskipti tiltekinna starfsmanna landsliðsins og leikmanna, vill KSÍ taka eftirfarandi fram:

Umræddir einstaklingar voru hluti af starfsmannateymi liðsins og voru því á varamannabekk (tæknihluta) liðsins. Tæknihlutinn er svæðið til hliðar við og aftan við sjálfan varmannabekkinn, svæði sem er afmarkað fyrir þennan hóp, og á því svæði sitja umræddir starfsmenn liðsins og þeir varamenn sem ekki komast fyrir á sjálfum varamannabekknum vegna fjarlægðarmarka. Allir í þessum hópi eru á meðal þeirra sem mega fara inn á leikflötinn fyrir leik, í hálfleik og eftir leik. Umræddir starfsmenn á því svæði voru því réttilega á því svæði sem tilheyrir liðinu og fóru ekki á neinum tímapunkti á milli svæða/hólfa á leikvanginum. Allir starfsmenn liðsins voru jafnframt hluti af „búbblu“ liðsins og hafa farið reglulega í skimun (jafn oft og leikmenn), eru hitamældir við komu á leikvang og annað slíkt.

Það er auðvitað leitt að starfsfólk landsliðsins hafi ekki virt nálægðarmörk í umræddu tilviki og sinnt sínum skyldum varðandi grímunotkun, sem er nokkuð sem við hefur verið minnt reglulega á innan raða liðsins. Tilfinningar eru stór hluti af íþróttum, fólk upplifir stórar hæðir og miklar lægðir, og stundum ráða þessar tilfinningar för og menn gleyma sér. Það afsakar ekki það sem gerðist, en gefur allavega skýringu. KSÍ mun áfram halda sóttvarnarskilaboðum á lofti, leitast við að gera betur og standa undir þeirri ábyrgð sem knattspyrnuhreyfingunni er ætlað í samfélaginu.