Knattspyrnusamband Íslands birti á heimasíðu sinni svar við gagnrýni Sævars Péturssonar, framkvæmdastjóra KA, á forgangsröðun mannvirkjasjóðs KSÍ við úthlutun styrkja til framkvæma. KA-menn fengu höfnun á umsókn sína um styrk til þess að lagfæra ónýta drenlögn undir Greifavellinum á Akureyri.

„Þrjátíu og sjö umsóknir bárust í mannvirkjasjóð KSÍ árið 2020 og er heildarkostnaður við áætlaðar framkvæmdir tæpir 5,6 milljarðar kr. Til úthlutunar í ár voru 30 milljónir og hlutu 20 verkefni styrk.

KA sótti um í mannvirkjasjóð KSÍ 2020 fyrir verkefni sem átti að ráðast í að loknu keppnistímabilinu 2020 og vera lokið á keppnistímabilinu 2020 (drenlögn á Akureyrarvöll). Ljóst er að afgreiðsla mannvirkjanefndar og stjórnar KSÍ á umsókninni ræður ekki úrslitum um ástand leikflatarins á Akureyrarvelli keppnistímabilið 2020.

Umsóknin fékk sömu umfjöllun hjá mannvirkjanefnd og stjórn KSÍ og aðrar umsóknir í mannvirkjasjóðinn. Fyrirliggjandi eru skorkort fyrir hverja umsókn og því mjög skýrt hvaða umsóknir ná að uppfylla skilyrði reglugerðar sjóðsins um styrk og hverjar ekki," segir í svari KSÍ við gagnrýni KA-manna.

„Öll verkefni sem bæta aðstöðu knattspyrnuhreyfingarinnar eru mikilvæg og myndi KSÍ gjarnan vilja styrkja sem flest þeirra. Fjármagnið í sjóðinn er hins vegar takmarkað og því eru umsóknir metnar samkvæmt gildandi skorkorti til að tryggja gegnsæi og stöðugleika við ákvarðanatöku.

Samkvæmt áætlun Akureyrarbæjar um framtíðarkeppnisvöll félagsins þá mun hann verða byggður upp á félagssvæði KA. Ekki er hins vegar fyllilega ljóst hvenær aðalkeppnisvöllur KA verður kominn upp á félagssvæði KA og vonandi skýrist það sem fyrst. Engu að síður hefur KA verið hvatt til að endurnýja sína umsókn fyrir næstu úthlutun sjóðsins, sem mun liggja fyrir í apríl 2021," segir enn fremur í svarinu sem birtist inni á heimasíðu KSÍ í kvöld.