Knattspyrnusamband Íslands mun fá sautján milljónir evra úr HatTrick-sjóð evrópska knattspyrnusambandsins, UEFA á fjögurra ára tímabili frá 2024 til 2028.

Þetta kemur fram í fréttatilkynningu frá UEFAsem segir að öll aðildarsambönd álfunnar fái umrædda upphæð.

Í svari UEFA við fyrirspurn Fréttablaðsins kemur fram að ekki sé búið að ákveða hversu stór hluti upphæðinnar sé til úthlutunar í mannvirkjagerð.

Framkvæmdar- og fjármálanefnd UEFA samþykkti í vikunni hækkar heildarupphæð sjóðsins um 160 milljónir evra fyrir næsta styrktartímabil sem hefst eftir tvö ár.

Það verður sjötta styrktartímabilið frá upphafi. Kemur fram á heimasíðu sjóðsins að sextíu prósent þjóðarleikvanga í Evrópu séu að hluta til fjármagnaðir með sjóðnum.

Þá hafi sjóðurinn um leið tekið þátt í uppbyggingu á æfingaaðstöðu fyrir landslið 34 þjóða og komið að því að reisa 1000 velli og 3000 sparkvelli víðsvegar um álfuna.

Skilyrði eru að samböndin nýti styrkina til þess að byggja upp aðstöðu fyrir landslið en einnig til að efla grasrótarstarfsemi, þjálfara- og dómaramenntun.

Í skýrslu sem UEFA gaf út á tíu ára afmæli HatTrick sjóðsins árið 2014 kom fram að KSÍ hefði meðal annars nýtt styrkinn til að leggja 111 sparkvelli víða um landið.

KSÍ hefur notað hluta fjármunanna í Mannvirkjasjóð KSÍ þar sem knattspyrnufélög geta sótt styrki vegna framkvæmda.