Króatía tekur á móti Englandi í Þjóðadeild UEFA í dag í Rijeka en það verða engir aðdáendur á vellinum enda seinni leikur í heimaleikjabanni sem Króatar voru dæmdir í eftir að hakakross var málaður á völl fyrir leik liðsins.

Er þetta 988. leikur enska landsliðsins og sá fyrsti sem liðið leikur fyrir luktum dyrum.

Stuðningsmenn Króatíu máluðu hakakross á völlinn fyrir leik Króatíu og Ítalíu í undankeppni EM 2016. Er þetta ekki í fyrsta sinn sem króatískir aðdáendur koma liðinu í vandræði og leika þeir oft fyrir luktum dyrum.

Einhverjir breskir stuðningsmenn ferðuðust til Króatíu í von um að sjá leikinn og verður fróðlegt að sjá hvort að þeir finna leið inn á völlinn.