Körfuknattleiksdeild Vals hefur gert samning við landsliðsmanninn Kristófer Acox um að spila með meistaraflokki félagsins. Kristófer kemur til Valsmanna frá KR en hann ákvað að yfirgefa Vesturbæjarfélagið eftir ágreining við félagið um samningsmál.

Hann er annar leikmaðurinn sem fer frá KR til Vals í sumar en áður hafði Jón Arnór Stefánsson farið þá leið. Síðasta sumar skipti Pavel Ermolinski frá KR til Vals. Finnur Freyr Stefánsson sem þjálfaði þríeykið hjá KR heldur nú um stjórnartaumana hjá Valsliðinu en hann tók við liðinu síðastliðið vor.

Þessi 27 ára gamli miðherji hefur leikið 40 landsleiki fyrir Íslands hönd og var meðal annars í leikmannahópnum sem lék á sínu öðru Eurobasket í Helsinki árið 2017.

Kristófer hefur leikið undanfarin ár með KR en hann útskrifaðist úr Furman háskólanum 2017 og á þar metið yfir bestu skotnýtingu yfir heilt tímabil. Kristófer hefur jafnframt verið atvinnumaður í Frakklandi og Filipseyjum síðan hann útskrifaðist.

Hann hefur í tvígang verið valinn besti leikmaður Íslandsmóts karla, árin 2018 og 2019, auk þess að vera valinn varnarmaður ársins og í lið ársins

„Ég er spenntur fyrir komandi tímabili. Það er gaman að komast í nýtt umhverfi og fá nýja áskorun til að hjálpa mér að bæta minn leik. Það voru mörg félög sem höfðu samband við mig eftir mánudaginn en eftir að hafa skoða málin þá hreifst ég af því sem er í gangi hér á Hlíðrenda" sagði Kristófer í samtali við heimasíðu Vals eftir að vistskiptin voru kunngjörð.