Óskar Bjarni segist eiga margar góðar sögur að segja frá tíma sínum sem aðstoðarþjálfari íslenska landsliðsins á þeim tímum sem Guðmundur var landsliðsþjálfari. Ein sagan kemur frá Ólympíuleikunum í Peking árið 2008.
Guðmundur er maður sem er með öll smáatriði á hreinu að sögn Óskars Bjarna og á Ólympíuleikunum í Peking var sturtan í hótelíbúð sem hann, og aðrir úr þjálfarateyminu deildu, að trufla landsliðsþjálfarann.
„Þannig var mál með vexti að í hvert skipti sem maður fór í sturtu flæddi alltaf vatn um baðherbergið, einangrun sturtuklefans var ekki nægilega góð og niðurfallið réði ekki við vatnsmagnið.
Við áttum eftir að vera þarna í einhvern tíma og þetta fór létt í taugarnar á okkur í íslenska teyminu en þó mest í taugarnar á Guðmundi.“
Óskar segist hafa haft gaman að því hversu mikið eitt svona smáatriði gat farið í taugarnar á Guðmundi.
„Á endanum lét hann ekki bjóða sér þetta lengur. Einn daginn mætir Guðmundur inn í íbúðina með sex Kínverja á eftir sér. Þá var hann búinn að ná í teymi og þetta var bara lagað á staðnum. Ég hafði mjög gaman að þessu, sjálfur hefði ég ekki nennt að standa í þessu en í kringum Guðmund þarf allt að vera upp á tíu.
Svo stóð Guðmundur þarna yfir þeim á meðan að þetta kínverska teymi vann að hlutunum, hann var að segja þeim til þarna svo þetta yrði nú eins og best væri á kosið.“
Það var kannski gott að Guðmundur lét koma í veg fyrir lekann, eitthvað sem hafði pirrað hann mjög, vegna þess að á umræddum Ólympíuleikum fór Ísland alla leið í úrslitaleik mótsins þar sem liðið þurfti að sætta sig við tap en silfurverðlaun. Besta árangur íslenska landsliðsins í handbolta til þessa á Ólympíuleikunum.
