DK Metcalf, útherji Seattle Seahawks, viðurkenndi að hafa nýtt sér bíl sem er notaður til að koma meiddum leikmönnum af vellinum til að drífa sig á klósettið um helgina í NFL-deildinni.

Metcalf sem er einn af bestu útherjum deildarinnar sást á bílnum í sjónvarpsútsendingum og var talið að hann væri að glíma við einhver meiðsli.

Þegar hann kom aftur inn á völlinn kom fram í sjónvarpsútsendingunni að hann hefði þurft að skjótast á klósettið og staðfesti Metcalf þetta á Twitter í leikslok.

Jason McCourty, fyrrum leikmaður í deildinni, hrósaði Metcalf fyrir útsjónarsemina þar sem búningsklefarnir væru langt frá bekknum í Detroit.