Katrín Tanja Davíðs­dóttir keppti í undan­keppni heims­leikanna í Cross­Fit í gær en sam­kvæmt ó­stað­festum niður­stöðum Morning chalk up nær Katrín ekki inn á heims­leikana. Ragnheiður Sara Sigmundsdóttir keppti einnig á mótinu og landar tólfta sæti samkvæmt þessum niðurstöðum.

Niður­stöður gætu enn breyst en sem stendur er Katrín í þriðja sæti og að­eins efstu tvö sætin komast á­fram. Að­eins munar fjórum stigum milli hennar og Elena Carra­tala Sana­huja frá Spáni sem situr nú í öðru sæti. Þær eru í áður­nefndri röð með 336 stig og 340 stig. Í fyrsta sæti er hin banda­ríska Ari­elle Loewen með 380 stig.

Verði þessar niður­stöður stað­festar án breytinga er það í fyrsta sinn frá árinu 2014 sem Katrín kemst ekki á­fram á heims­leikana. Hún hlaut nafnbótina Hraustasta kona heims árið 2015 og 2016.

Keppt var í fjórum æfingum á mótinu. Katrín landaði fyrsta sæti í æfingu númer tvö, fjórða sæti í fjórðu æfingunni, sjöunda sætið í þeirri þriðju og áttunda sæti í fyrstu. Nánari upp­lýsingar um æfingarnar verða birtar síðar.