Keppni hélt áfram á alþjóðlegri FIS-mótaröðinni á skíðum í Abetone á Ítalíu um síðustu helgi. Yfir 100 keppendur voru skráðir til leiks en Katla Björg Dagbjartsdóttir gerði sér lítið fyrir og vann svigmót mótsins. Er þetta í fyrsta sinn sem hún sigrar á alþjóðlegu FIS-móti á erlendri grundu og í annað sinn sem hún nær á verðlaunapall.

Katla Björg fékk 62.74 FIS-stig sem eru hennar næst bestu á ferlinum og mun hún bæta stöðu sína á heimslistanum næst þegar hann verður gefinn út.

Hólmfríður Dóra Friðgeirsdóttir átti einnig flott mót og endaði í fimmta sæti og fékk 74.44 FIS-stig. Fríða Kristín Jónsdóttir endaði í 46. sæti en Hjördís Birna Ingvadóttir náði ekki að ljúka seinni ferð.

Næstu tvo daga fara fram tvö stórsvigsmót á sama stað.