Kate Greville, fyrrum kærasta Ryan Giggs viðurkenndi í dómssal í gær að hafa logið að Giggs um að krabbameinsfrumur hafi fundist í henni. Í dag fer fram dagur fimm í réttarhöldunum en Giggs, sem er fyrrum leikmaður Manchester United er sakaður um að hafa beitt Kate andlegu og líkamlegu ofbeldi á meðan að sambandi þeirra stóð.

Það er í október árið 2020 sem Kate segist hafa logið að Giggs að krabbameinsfrumur hafi fundist í henni. Hún hafi gert það til þess að reyna komast hjá því að sofa hjá honum.

,,Ég sé eftir því að hafa sagt þessa hluti en ég þurfti að segja eitthvað," sagði Kate í vitnastúkunni í gær. „Þurfti að segja eitthvað til að ná honum af mér til þess að hann myndi láta mig í friði."

The Athletic hefur tekið saman allar ásakanirnar á hendur Giggs og eru þær eftirfarandi auk meintrar árásar sem á að hafa átt sér stað í nóvember árið 2020:

  • Að hafa sent fyrrum kærustu skilaboð, og/eða blokkað hana þegar að hún var úti að skemmta sér með vinkonum sínum.
  • Hótaði að senda tölvupósta á vini hennar sem og samstarfsmenn um kynferðislegar athafnir þeirra og hegðun.
  • Hent henni (Greville) og eigum hennar út úr húsinu þegar að hún spurði Giggs út í samband hans við aðrar konur.
  • Á Stafford hótelinu í Lundúnum, hafi hann sparkað í bak hennar, hent henni út úr herberginu án klæða og í kjölfarið hent tösku hennar í hana eftir að Greville sakaði Giggs um að hafa reynt við aðrar konur.
  • Ítrekað sent óæskileg skilaboð og hringt óæskileg símtöl til hennar og vina hennar þegar að hún reyndi að slíta sambandi þeirra.
  • Mætti ítrekað óumbeðinn á heimili hennar, vinnustað sem og líkamsræktarstöð eftir að hún reyndi að binda enda á samband þeirra.

Giggs hefur neitað sök í öllum liðum en undanfarna mánuði hefur hann verið laus gegn tryggingu gegn ákveðnum skilyrðum. Hann hefur ekki mátt setja sig í samband við Kate Greville né Emmu systur hennar.