Körfuboltamaðurinn Kári Jónsson hefur samið við Hauka og mun hann spila með liðinu í vetur. Búist var við því að Kári færi utan og reyndi aftur fyrir sér í atvinnumennsku en kórónaveiran hefur hins vegar sett strik í reikninginn og nokkrir möguleikar sem Kári hafði gengu ekki upp.

Kári gekk í gegnum erfið meiðsli fyrir síðustu leiktíð og var hægt og bítandi að komast í sitt rétta horf þegar mótið var blásið af. Kári er á þessum tímapunktin kominn í sitt besta form. Á síðustu leiktíð skilaði hann 17 stigum, 3.5 fráköstum, 6.8 stoðsendingum og var með 17.7 í framlag.

„Ég er mjög spenntur fyrir komandi tímabili hjá Haukum og þarna eru margir nýjir leikmenn sem verður spennandi að spila með. Við munum gefa allt í þetta eftir lengsta undirbúningstímabil sögunnar og vonandi sjáum við sem flesta í stúkunni að hvetja,“ segir Kári í samtali við heimasíðu Hauka um komandi tíma með liðinu.

„Að hafa þann möguleika á að þjálfa Kára er frábært því hann er góður drengur og gefur sig allan í þetta. Þetta er stór ráðning fyrir okkur og ég er handviss um að hann muni hjálpa liðinu að ná þeim takmörkum sem við höfum sett okkur,“ segir Israel Martin, þjálfari Hauka, um þessi tíðindi.