Kári Gunnarsson lauk í gær leik á alþjóðlegu móti í badminton sem fram fór í Íran. Mótið ber heitið The 28th Iran Fajr International Challenge 2019 og líkt og nafnið gefur til kynna er mótið hluti af International Challenge mótaröðinni sem gefur stig á heimslistanum.

Eins ogKári fór yfir í viðtali við Fréttablaðið í síðustu viku stefnir hann að því að klifra nægilega mikið á heimslistanum til þess að öðlast þátttökurétt á heimsmeistaramótinu í ágúst síðar á þessu ári og svo Ólympíuleikunum í Tókýó árið 2020.  

Mótið var mjög fjölmennt í einliðaleik karla og hófst aðalkeppnin á 64 keppendum en einnig var áður keppt í forkeppni í einliðaleik karla þar sem 32 keppendur voru. Það er staðan á heimslistanum sem ákvarðar hverjir þurfa að fara í forkeppni og hverjir komast beint inn í aðalkeppnina. 

Kári fór beint inn í aðalkeppnina og í 64 manna úrslitum mætti hann Alberto Alvin Yulianto frá Indónesíu en hann þykir mikið efni þar í landi en hann er 19 ára gamall. Kári vann Alberto nokkuð örugglega 21-14 og 21-16.  

Í 32 manna úrslitum mætti Kára rússanum Sergey Sirant en honum var raðað í þriðja sæti inn í mótið. Sergey er sem stendur í 73. sæti heimslistans en Kári er nr. 174. Átti Kári í fullu tré við hann en leiknum lauk með sigri Sergey 21-16 og 21-18. 

Kári mun síðan taka þátt í öðru móti sem er sömuleiðis hluti af International Challenge mótaröðinni í seinni hluta febrúar en það fer fram í Úganda.