Jón Þór Hauks­son, þjálfari ís­lenska kvenna­lands­liðsins í fót­bolta, varð fyrir því ó­láni að handar­brotna þegar ís­lenska liðið vann frá­bæran sigur á því slóvakíska í undan­keppni EM í kvöld.

Ís­land var undir í hálf­leik, 1-0, en sneri taflinu við í seinni hálf­leik og vann að lokum 3-1 sigur. Skömmu eftir að flautað var til síðari hálf­leiks varð raf­magns­laust á vellinum í Senec í Slóvakíu. Jón Þór lýsir því í við­tali við Fót­bolta.net hvað gerðist í kjöl­farið.

„Eftir stoppið í raf­magns­leysinu vorum við að stappa stálinu í hvert annað og ég lem í nudd­bekk með krepptum hnefa. Ég hitti þar utan á hnefann og braut beinið sem er efst uppi í litla puttanum. Það er smá­vægi­legt og ég verð klár á þriðju­daginn,“ sagði Jón Þór sem var á sjúkra­húsinu þegar Fót­bolti.net ræddi við hann.

Jón Þór segist ekki hafa barið í bekkinn í reiði­kasti heldur hafi hann ætlað að leggja á­herslu á að liðið héldi á­fram af sama krafti og það byrjaði seinni hálfleikinn. „Ég sagði við stelpurnar eftir leikinn að ég ætlaði ekki að fara að brjóta bein í hvert skipti sem þyrfti að koma til baka en ef það var þetta sem þurfti þá var ég hæst­á­nægður með það og fórna mér glaður í það.“