Íslandsmeistaramótið í 25 metra laug sem fram fór í Ásvallarlaug um nýliðna helgi var eina tækifæri sundfólks til að ná lágmörkum á Norðurlandameistaramótið sem haldið verður í Svíþjóð í byrjun desember og heimsmeistaramótið í 25 metra laug sem haldið verður í Abu Dhabi í Sameinuðu Arabísku Furstadæmunum um miðja desember. 

Alls náðu 11 sundmenn lágmörkum á Norðurlandadómtið og Jóhanna Elín Guðmundsdóttir náði tveimur lágmörkum á heimsmeistaramótið en það gerði hún í 50 metra skriðsundi og 100 metra skriðsundi. 

Jóhann Elín vann átta gullverðlaun á Íslandsmeistaramótinu um helgina og varð stigahæst kvennamegin en kærasti hennar Dadó Fenrir varð stigahæstur karlamegin.

Þau Anton Sveinn McKee úr SH og Snæfríður Sól Jórunnardóttir úr Aalborg höfðu þegar náð lágmörkum erlendis en taka ekki þátt að þessu sinni.

Hópurinn sem fer á Norðurlandamótið er eftirfarandi: Birnir Freyr Hálfdánarson, SH, Daði Björnsson, SH, Eva Margrét Falsdóttir, ÍRB, Freyja Birkisdóttir, Breiðablik, Kristín Helga Hákonardóttir, Breiðablik, Katja Lilja Andriysdóttir, SH, Símon Elías Statkevicius, SH, Snorri Dagur Einarsson, SH, Steingerður Hauksdóttir, SH, Sunneva Bergmann Ásbjörnsdóttir, ÍRB, Veigar Hrafn Sigþórsson, SH.

Eftirtalin hafa einnig synt undir lágmörkum en taka ekki þátt að þessu sinni: Anton Sveinn McKee, Dadó Fenrir Jasminuson, Jóhanna Elín Guðmundsdóttir og Snæfríður Sól Jórunnardóttir.