Jóhann Berg Guðmundsson, vængmaður Burnley og íslenska karlalandsliðsins í knattspyrnu, getur leikið með liðinu þegar liðið mætir Wolves í ensku úrvalsdeildinni á Molineux í hádeginu á sunnudginn. 

Þetta staðfesti Sean Dyche, knattspyrnustjóri Burnley, á blaðamannafundi sem haldinn var í morgun. Þar sagði hanni að Jóhann Berg hefði náð sér að fullu og gæti byrjað leikinn. 

Jóhann Berg meiddist aftan í læri í deildarleik með Burnley gegn Watford í lok águst og hefur ekki leikið með liðinu síðan og missti sömuleiðis af leikjum íslenska liðsins gegn Sviss og Belgíu í Þjóðadeild UEFA. 

Burnley hefur einungis fengið eitt stig úr fyrstu fjórum leikjum sínum í deildinni á yfirstandandi leiktið og situr í 19. sæti deildarinnar fyrir umferð helgarinnar.