„Þetta er mjög stórt skref í rétta átt. NBA-deildin er stærsta körfuboltadeild heims með öllum bestu leikmönnunum og bestu liðunum. Þegar kona stýrir á þessu stigi, þó að það sé ekki nema í einum leik, sýnir það að þetta sé raunhæft markmið,“ segir Danielle Victoria Rodriguez, aðstoðarþjálfari kvennalandsliðsins í körfubolta og karlaliðs Stjörnunnar í körfubolta, í samtali við Fréttablaðið um afrek Becky Hammon.

Becky, sem sinnir starfi aðstoðarþjálfara San Antonio Spurs, heldur áfram að ryðja veginn í NBA-deildinni í körfubolta en hún varð í vikunni fyrsta konan til að stýra liði í leik í NBA-deildinni. Um miðbik annars leikhluta var Greg Popovich, þjálfara Spurs, vikið af velli og gaf hann undir eins til kynna að Becky myndi stýra liðinu það sem eftir lifði leiks.

„Þessi ákvörðun setur hlutina í samhengi, ekki aðeins fyrir konur sem setja sér það markmið að þjálfa í NBA heldur bara konur sem vilja þjálfa atvinnulið á heimsvísu. Það hefur mikil aukning orðið á kvenkyns þjálfurum í háskólaboltanum og þetta er okkur mikil hvatning. Hún er metin út frá þekkingu og getu til að stýra liðinu. Það þarf ekki bara að vera annað kynið.“

Á tölfræðiskýrslum verður Pop­o­vich skráður þjálfari Spurs í leiknum en þessi goðsagnakenndi og sigursæli þjálfari var þarna enn einu sinni að setja allt sitt traust á fyrrverandi WNBA-leikmanninn. Leiknum lauk með 121-107 sigri meistaranna í Los Angeles Lakers en LeBron James var meðal þeirra sem hrósuðu Becky eftir leikinn.

Becky var sex sinnum valin í stjörnuliðið sem leikmaður í WNBA-deildinni, efstu deild körfuboltans í Bandaríkjunum, og lék í sjö ár með New York Liberty og átta ár með San Antonio Stars. Á lokaári sínu sem leikmaður Stars meiddist Becky illa og var henni boðið að aðstoða við þjálfun hjá San Antonio Spurs. Þegar skórnir fóru upp í hillu var hún því búin að vera að aðstoða Spurs og bauð Popovich henni starf sem aðstoðarþjálfari liðsins.

Með því varð hún fyrsta konan sem hafði atvinnu af þjálfarastarfi í NBA en aðeins ein kona hafði áður unnið við þjálfun í NBA, þá sem sjálfboðaliði.

„Hún var sjálf frábær leikmaður og nýtir þá reynslu vel í starfi. Hún er að vinna með Popovich sem er einn af bestu þjálfurum allra tíma en hann hefur trú á henni og gefur henni tækifæri. Það hefur ekki verið sjálfsagt að konur fái þetta tækifæri sem hún hefur nú fengið og hún hefur svo sannarlega gripið það. Það þarf ekki að fara lengra en Ísland, hérna heima eru ekki margar konur sem eru aðalþjálfarar,“ segir Danielle.

Í dag eru níu konur sem eru aðstoðarþjálfarar í NBA-deildinni.

„Þetta verður stóratriði á ferilskránni hennar og opnar fjölmargar dyr. Þetta er vonandi hvatning fyrir kvenþjálfara sem stefna að því að komast að hjá atvinnumannaliðum.“