Íslensku keppendurnir á Evrópumeistaramótinu í Glasgow í Skotlandi hafa allir nema Anton Sveinn McKee lokið keppni í dag. Anton Sveinn keppir í undanúrslitum í 100 metra bringusundi síðdegis í dag.

Dadó Fenrir Jasmínuson reið á vaðið þegar hann synti 50 metra skriðsund á tímanum 22,59 sekúndur sem er 30/100 frá hans besta tíma í greininni.

Þá var komið að Eygló Ósk Gústafsdóttur í 200 metra baksundi en hún synti á tímanum 2:10,46 sekúndum sem er besti tími hennar í þessari grein á þessu ári. Eygló Ósk á Íslandsmetið í greininni sem er 2:03,53 sekúndur en hún setti það á Evrópumeistaramótinu í Ísrael árið 2015.

Næst stakk sér til sunds Kristinn Þórarinsson í 200 metra fjórsundi. Hann kom í bakanna á tímanum 2:00,44 sem er rétt aðeins frá hans besta tíma sem er 2:00,04 sekúndur. Hann hefði gert sér vonir um meira, en hann á eftir að synda 100 metra fjórsund og 50 metra baksund.

Ingibjörg Kristín bætti metið aftur tíu árum síðar

Í lokin var boðsund 4x50 metra skriðsund kvenna. Íslensku sveitina skipuðu þær Jóhanna Elín Guðmundsdóttir (25,48), Ingibjörg Kristín Jónsdóttir (24,64), Snæfríður Sól Jórunnardóttir (25,04) og Eygló Ósk Gústafsdóttir (25,78).

Þær syntu sundið á tímanum 1:40,94 sem er nýtt landsmet. Þess má til gamans geta að Ingibjörg Kristín átti einnig þátt í gamla landsmetinu frá árinu 2009 í Istanbul.

Þar synti íslenska sveitin á tímanum 1:42,90 þannig þetta var tveggja sekúnda bæting þrátt fyrir að árið 2009 væri ennþá verið að synda í gömlu plastgöllunum.

Önnur skemmtileg staðreynd er að árið 2009 var Hrafnhildur Lúthersdóttir í sveit Íslands, en hún sat á pöllunum hér Glasgow og horfði á nýja metið sett.