Þrír íslenskir leikmenn eru í herbúðum aðalliðs danska úrvalsdeildarliðsins í fótbolta FC Köbenhavn. Það eru þeir Andri Fannar Baldursson, Ísak Bergmann Jóhannesson og Hákon Arnar Haraldsson. Orri Steinn Óskarsson leikur svo með U-19 ára og varaliði danska stórveldisins. Orri Steinn hefur skoraði 11 mörk í átta leikjum fyrir U-19 ára lið FC Köbenhavn.

Hákon Arnar hefur verið á mála hjá FC Köbenhavn síðan sumarið 2019 en fyrir þessa leiktíð var hann færður upp í aðalliðshóp félagsins og á dögunum byrjaði hann sinn fyrsta leik fyrir aðalliðið. Þessi 18 ára gamli framherji gerði sér lítið fyrir og skoraði eitt marka liðsins í sigri gegn Vejle og var valinn maður leiksins fyrir frammistöðu sína.

Andri Fannar Baldursson kom svo til FC Köbenhavn á láni frá ítalska félaginu Bologna í ágúst en miðvallarleikmaðurinn hefur spilað sex leiki í öllum keppnum til þess á lánstíma sínum.

Ísak Bergmann Jóhannesson gekk til liðs við FCK frá sænska liðinu Norrköping á svipuðum tíma og Andri Fannar en hann samdi við Kaupmannahafnarfélagið til ársins 2026.

Ísak Bergmann, sem er 18 ára gamall, hefur spilað reglulega inni á miðsvæðinu hjá FC Köbenhavn en hann hefur spilað tíu leiki í öllum keppnum. Í þeim leikjum hefur Ísak Bergmann skorað eitt mark og átt eina stoðsendingu.

Íslendingar fljótir að aðlagast

Brian Fonseca, yfirnjósnari FC Köbenhavn á Norðurlöndum, segir íslenska leikmenn henta vel inn í hugmyndafræði Kaupmannahafnarliðsins og reynslan af þeim sé afar góð.

„Kjarni FC Köbenhavn hefur í gegnum tíðina verið skipaður leikmönnum frá Norðurlöndunum og íslenskir leikmenn hafa reynst okkur vel.

Sölvi Geir Ottesen og Ragnar Sigurðsson spiluðu hérna lengi við góðan orðstír og þá spiluðu Björn Bergmann Sigurðarson og Rúrik Gíslason vel fyrir FC Köbenhavn,“ segir Fonseca.

„Íslensku leikmennirnir sem hafa komið til okkar í kringum 17 ára aldurinn hafa aðlagast mjög vel þeim kröfum sem gerðar eru til leikmanna hjá FC Köbenhavn, bæði inni á vellinum og hvað hugarfar varðar. Við erum núna með Hákon Arnar Haraldsson sem hefur þróast hratt hjá okkur frá því að leika í U-19 ára liðinu í það að spila vel með aðalliðinu einungis 18 ára gamall.

Það má ekki gleyma því að það var mikil pressa á Hákoni Arnari þar sem hann var að spila leik sem liðið þurfti að hafa betur í. Þrátt fyrir að við værum að spila við botnlið deildarinnar, þá var þetta leikur sem liðið þurfti að fá stig í til að halda sér í toppbaráttu.

Hákon Arnar stóðst þá pressu frábærlega og skilaði sínu afar vel og það var gaman að sjá það,“ segir Fonseca.

Styttist í að Orri fái tækifæri

„Þá erum við með Orra Stein Óskarsson, sem hefur raðað inn mörkum fyrir U-19 ára liðið, og mun að öllum líkindum fá tækifæri með aðalliðinu á einhverjum tímapunkti seinna á þessu keppnistímabili ef fram heldur sem horfir,“ segir njósnarinn. Það verður mjög spennandi að fylgjast með framgöngu hans,“ segir Fonseca.

„Íslenskir leikmenn þurfa annað hvort að koma til okkar ungir eins og Hákon Arnar og Orri Óskar gerðu og fara í gegnum akademíuna eins og Hákon Arnar gerði eða taka milliskref á borð við það sem Ísak Bergmann gerði með því að spila fyrir Norrköping og Andri Fannar, sem fékk smjörþefinn af alþjóðlegum bolta hjá Bologna,“ segir hann.

Hugarfarið er einkar gott

„Það er mjög ólíklegt að leikmenn sem eru orðnir eldri en tvítugir og leika enn í íslensku deildinni geti stokkið í það að spila með FC Köbenhavn, þar sem munurinn á deildunum, það er þeirri íslensku og dönsku efstu deildunum, er einfaldlega of mikill. Leikmenn frá Íslandi hafa hins vegar góðan grunn, eru vel þjálfaðir og eru taktískt og andlega mjög sterkir,“ segir Fonseca.

„Auðvitað er það tilviljunum háð hversu marga leikmenn frá hverri þjóð FC Köbenhavn hefur á að skipa hverju sinni. Það er aftur á móti engin tilviljun að við beinum sjónum okkar að Íslandi þegar við leitum að leikmönnum.

Reynslan sýnir okkur að Íslendingar hafa staðið sig hérna, bæði í að komast úr akademíunni og upp í aðalliðið og þeir leikmenn sem við höfum keypt beint inn í aðalliðið,“ segir þessi reynslumikli njósnari.

Ísak Bergmann malar gull

Ísak Bergmann var keyptur til FCK á 450 milljónir króna í sumar frá sænska félaginu IFK Norrköping. Markaðsvirði Ísaks er í dag tæpar 700 milljónir, því má fullyrða að danska félagið hafi gert ansi góð kaup.

Ísak ólst upp í Bretlandi og á Akranesi. Hann er sonur fyrrverandi landsliðsmannsins Jóhannesar Karls Guðjónssonar sem nú er þjálfari ÍA.

Þess má geta að ÍA naut góðs af sölu Ísaks til Kaupmannahafnar og fékk í sinn hlut um 90 milljónir króna.