Skíðasamband Íslands tilkynnti í dag landslið Íslands fyrir næsta tímabil og tilkynnti um leið að stefnt væri að því Ísland myndi senda þátttakendur á heimsmeistaramótið á snjóbrettum í fyrsta sinn.

Þetta kemur fram á vef Skíðasambands Íslands í dag. Í snjóbrettalandsliðinu eru þeir Baldur Vilhelmsson, Benedikt Friðbjörnsson og Marinó Kristjánsson.

„Það er að sjálfsögðu kominn spenna hjá strákunum. Þeir hafa verið að fikra sig upp heimslistann undanfarin ár með góðum árangri á mótum erlendis,“ sagði Friðbjört Benediktsson, formaður snjóbrettanefndar SKÍ þegar Fréttablaðið heyrði í honum í dag.

„Þetta er búið að vera markmið okkar, að senda þátttakendur á HM frá því að snjóbrettadeildin var stofnuð innan SKÍ árið 2011. Brettin höfðu alltaf verið utan sambands þangað til en þetta hefur verið í stöðugum vexti hjá okkur.“

Áætlað er að keppnin fari fram í Zhangjiakou í Kína á næsta ári. Fyrir vikið hafa drengirnir nægan tíma til að undirbúa sig.

„Það verða einhverjar æfingar í sumar og farið til Noregs í ágúst en þegar líða tekur á veturinn verður allt sett í botn. Það verður vonandi í boði þátttökuréttur á heimsbikarnum í aðdraganda mótsins. Árangur þeirra síðustu ár gerir það að verkum að þeim gæti verið boðið að taka þátt.“