Ísland tryggði sér sæti í umspili um laust sæti í lokakeppni heimsmeistaramótsins í handbolta kvenna sem fram fer í Japan á næsta ári með 49-18 sigri sínum gegn Aserbaídsjan í lokaumferð í undankeppni mótsins sem fram fór í Skopje í Makedóníu. 

Ljóst var fyrir leiknn að 26 eða 27 marka sigur myndi koma liðinu í umspilið með bestan árangur í öðru sæti í riðlunum fjórum. Þá er möguleiki á að íslenska liðið hafni í efsta sæti ef Makedónía misstígur sig þegar liðið mætir Tyrklandi í lokaleik riðilsins seinna í kvöld. 

Þórey Rósa Stefánsdóttir var markahæst hjá Íslandi með 13 mörk, Arna Sif Pálsdóttir kom næst með sex mörk og Ester Óskarsdóttir, Sigríður Hauksdóttir og Díana Dögg Magnúsdóttir skoruðu fimm mörk hver. 

Umspilið um laust sæti á HM verður leikið í júní á næsta ári.