Íslenska U-21 árs landsliðið fer ekki á lokamót EM á næsta ári eftir markalaust jafntefli gegn Tékklandi í dag. Fyrri leikur liðanna fór 1-2 fyrir Tékka á Íslandi og þurfti því sigur í dag.

Fyrri hálfleikur var fremur rólegur. Ísland stýrði leiknum þó að mestu og var lítil sem engin ógn nálægt marki liðsins.

Aftur á móti átti íslenska liðið sömuleiðis erfitt með að skapa sér færi hinum megin á vellinum þrátt fyrir að vera töluvert meira með boltann.

Markalaust var að loknum fyrri hálfleik.

Ísland tók algjörlega yfir leikinn snemma í seinni hálfleik.

Eftir rúmar tíu mínútur átti íslenska liðið tvær góðar marktilraunir með stuttu millibili. Fyrst varði markvörður Tékka frá Andra Fannari Baldurssyni eftir frábær tilþrif miðjumannsins. Skömmu síðar átti Dagur Dan Þórhallsson skot rétt framhjá.

Eftir rúman klukkutíma leik fékk Orri Steinn Óskarsson svo dauðafæri. Hann skallaði þá framhjá eftir fyrirgjöf Óla Vals Ómarssonar.

Við tók um stundarfjórðungs kafli þar sem lítið gerðist hvorugu megin. Svo tók íslenska liðið hins vegar aftur við sér.

Ísland þjarmaði að heimamönnum á lokamínútunum og fékk Valgeir Lunddal Friðriksson besta færið til að jafna. Það var hins vegar varið frá honum glæsilega.

Það sauð allt upp úr í lok leiks og fékk Valgeir að líta rauða spjaldið. Lokatölur urðu aftur á móti 0-0.