Íþrótta- og Ólympíusamband Íslands, ÍSÍ, tilkynnti í dag að Hafrún Kristjánsdóttir, Kjartan Bjarni Björgvinsson og Rán Ingvarsdóttir verða í nefnd sem gerir úttekt á viðbrögðum og málsmeðferð KSÍ vegna kynferðisofbeldismála sem tengst hafa leikmönnum í landsliðum Íslands.

KSÍ leitaðist eftir því að ÍSÍ myndi stofna nefnd sem tæki út viðbrögð sambandsins eftir að það kom í ljós að KSÍ hafði hylmt yfir ofbeldisbrot landsliðsmanna karlalandsliðsins í knattspyrnu.

Um leið hefur KSÍ lofað því að nefndin fái aðgang að öllum þeim gögnum sem það óskar eftir og er von á niðurstöðum til framkvæmdarstjórnar ÍSÍ í nóvember.

Nefndin mun skoða eftirfarandi:

  • Fara yfir þá atburðarás sem leiddi til afsagnar formanns og fyrirhugaðrar afsagnar stjórnar KSÍ í september 2021 ásamt því að bregðast við ásökunum sem fram hafa komið m.a. um þöggun innan KSÍ.
  • Staðreyna eins og kostur er hvaða vitneskja hafi verið innan stjórnar og / eða starfsmanna KSÍ um að leikmenn landsliða eða aðrir sem starfa fyrir KSÍ hafi beitt kynbundnu eða kynferðislegu ofbeldi á árunum 2010 – 2021.
  • Lýsa því hvernig eftirliti og viðbrögðum við slíkum atvikum var háttað innan KSÍ á fyrrgreindu tímabili.
  • Taka til athugunar hvort einhverjar þær aðstæður séu uppi innan KSÍ sem hamla þátttöku kvenna í starfi þess. Þetta er gert í tengslum við fullyrðingar sem fram hafa komið í opinberri umræðu um að KSÍ sé karllægt og fráhrindandi fyrir konur. Í því sambandi verður skoðað hvort skipulag KSÍ eða aðrir þættir í starfseminni séu hamlandi fyrir þátttöku kvenna í starfinu.
  • Leggja grunn að tillögum um úrbætur á verklagi eða um frekari viðbrögð.